Ayollar qanoti

    “Milliy tiklanish” demokratik partiyasi “Ayollar qanoti” - partiyaning mustaqil tarkibiy bo‘g‘ini hisoblanadi va bevosita MTDP Markaziy kengashi Ijroiya qo‘mitasiga bo‘ysunadi. Partiyaning “Ayollar qanoti” MTDP tarkibida MTDP aʼzolari – xotin-qizlarning qarashlari, manfaat va maqsadlari mushtarakligi asosida tuzilgan. Unga aʼzo bo‘lish ixtiyoriydir. MTDPning “Ayollar qanoti” O‘zbekiston Respublikasi hududida o‘z faoliyatini amalga oshiradi.

     MTDPning “Ayollar qanoti” O‘zbekiston Respublikasi Konstitutsiyasi, O‘zbekiston Respublikasining “Siyosiy partiyalar to‘g‘risida”gi Qonuni va boshqa qonun hujjatlari, MTDP Ustavi va Dasturi, MTDP Markaziy kengashi (MK), Markaziy kengashi Ijroiya qo‘mitasining qarorlari hamda mazkur Nizomga muvofiq faoliyat yuritadi.

     MTDPning “Ayollar qanoti” maqsad va vazifalarini MTDP MK Ijroiya qo‘mitasi devoni Xotin-qizlarning ijtimoiy-siyosiy faolligini oshirish masalalari bo‘limi (bundan keyingi matnlarda Bo‘lim deb yuritiladi) yordamida amalga oshiradi. MTDP “Ayollar qanoti”ning faoliyatiga umumiy rahbarlikni MTDP MK Ijroiya qo‘mitasi devoni Xotin-qizlarning ijtimoiy-siyosiy faolligini oshirish masalalari bo‘limi boshlig‘i amalga oshiradi.