Yoshlar qanoti

    “Milliy tiklanish” demokratik partiyasi “Yoshlar qanoti” partiyaning mustaqil tarkibiy bo‘linmasi hisoblanadi va bevosita MTDP Markaziy kengashi Ijroiya qo‘mitasiga bo‘ysunadi. Partiyaning “Yoshlar qanoti” bo‘g‘ini MTDP tarkibida tashkil qilingan hamda MTDP yoshlarining qarashlari, manfaat va maqsadlari mushtarakligi asosida tuzilgan. Unga a’zo bo‘lish ixtiyoriydir. MTDP “Yoshlar qanoti” bo‘g‘ini O‘zbekiston Respublikasi hududida o‘z faoliyatini amalga oshiradi.

     MTDPning “Yoshlar qanoti” O‘zbekiston Respublikasi Konstitutsiyasi, O‘zbekiston Respublikasining “Siyosiy partiyalar to‘g‘risida”gi Qonuni va boshqa qonun hujjatlari, MTDP Ustavi va Dasturi, MTDP Markaziy kengashi (MK) Ijroiya qo‘mitasining qaror va buyruqlari hamda mazkur Nizomga muvofiq faoliyat yuritadi.

     MTDPning “Yoshlar qanoti” maqsad va vazifalarini MTDP Markaziy Kengashi (MK) Ijroiya Qo‘mitasi devoni Yoshlar masalalari bo‘limi (bundan keyingi matnlarda Bo‘lim deb yuritiladi) yordamida amalga oshiradi. MTDP “Yoshlar qanoti”ning faoliyatiga umumiy rahbarlikni MTDP MK Ijroiya qo‘mitasi devoni Yoshlar masalalari bo‘limi boshlig‘i amalga oshiradi.