Partiya fraksiyasining ayni paytda boshlangan yig‘ilishida Prezident Shavkat Mirziyoyev raisligida 20-iyun kuni muhandislik sohalarida kadrlar tayyorlash va oliy taʼlim muassasalari faoliyatini yanada takomillashtirish masalalari yuzasidan o‘tkazilgan videoselektor yig‘ilishi mazmun-mohiyati muhokama qilindi.

     Taʼkidlanganidek, bugun mamlakatimiz taraqqiyotiga xalaqit berayotgan masalalardan biri oliy taʼlim bilan bog‘liq. Oliy taʼlim diplom olish uchun o‘qiydigan joy emas. Oliy taʼlim olgan har bir fuqaro O‘zbekistonni rivojlantirish, xalqimiz farovonligiga xizmat qiladigan yangiliklarni yaratish masʼuliyatini zimmasiga olishi kerak.

     – Afsuski, bugun nafaqat oliy taʼlim, aksariyat tizimlar bu vazifani to‘la bajara olmayapti, – dedi fraksiya rahbari Alisher Qodirov.