G‘oya Qo‘rg‘ontepada ham, Xo‘jaobodda ham qo‘llab-quvvatlanyapti. Ammo...

Inson qadrini ulug‘lash g‘oyasi asosida Bosh Qonunimiz o‘zgarayotgani yaxshi, albatta. Ammo bu o‘zgarishlar mazmun-mohiyatini avvalo o‘zimiz tushunib olib, qo‘llab-quvvatlasakkina ezgu maqsadlarimizga erishamiz.

Vodiyning aholisi eng zich bo‘lgan Andijonda nafaqat sharoitlar, fuqarolarning dunyoqarashlari ham o‘zgaryapti. Ular avvalgidek tortinchoq, “xo‘p-xo‘p”chi emas...

Bu holat Oliy Majlis Qonunchilik palatasi deputatlari bilan uchrashuvlarda yaqqol sezilmoqda.

Kuni kecha “Milliy tiklanish” fraksiyasi aʼzolari Tursunoy Murotova Qo‘rg‘ontepa tumanida, Jahongir Abdurasulov Asaka, Farhod Ashmatov Shahrixonda, Baxtiyor Maniyazov esa Xo‘jaobod tumanida o‘z saylovchilari bilan uchrashdilar.

– Bugun dunyoda kuzatilayotgan o‘zgarishlar asnosida jonajon Vatanimiz ham o‘zgaryapti, – dedi Tursunoy Murotova. – Bu o‘zgarishlar mavsumiy bo‘lib qolmasligi uchun Konstitutsiyaviy islohotlarga alohida eʼtibor qaratilmoqda. Xususan, yangi tahrirdagi Konstitutsiyamizga “inson – jamiyat – davlat” degan g‘oya singdirilmoqda, inson manfaati har narsadan ustun qo‘yilyapti.

J. Abdurasulov esa Konstitutsiyaga yoshlar bilan bog‘liq alohida bob kiritilayotganini taʼkidlab, kelajagimiz egalarining taʼlim olishi, ijtimoiy va tibbiy himoyasi, uy-joyli bo‘lishi, bandligi uchun shart-sharoitlar yaratish – konstitutsiyaviy majburiyat sifatida belgilab qo‘yilayotganini aytdi.  

– Konstitutsiyaviy qonun loyihasida aholi salomatligini asrash bilan bog‘liq normalar 4 barobar ko‘paytirilayotgani xalqimiz sog‘lig‘ini ishonchli muhofaza etish, onalar va bolalar o‘limi, yuqumli kasalliklar tahdidini bartaraf etishda juda muhim ahamiyatga ega, – dedi F.Ashmatov.

Uning aytishicha, joriy yilda “Kafolatlangan xizmatlar paketi” qayta ko‘rib chiqilib, unda 20 turdagi kasalliklar bo‘yicha diagnostika, davolash va profilaktika xizmatlari hajmi to‘liq qamrab olinadi. Ko‘p uchraydigan 20 turdagi kasalliklar bo‘yicha birlamchi bo‘g‘indagi bepul analiz turlari – 15 tadan 25 tagacha, tekshiruvlar – 10 tadan 20 tagacha, dorilar – 64 tadan 90 taga oshiriladi.

B.Maniyazov esa bo‘lajak Referendum haqida maʼlumot berib, bu to‘g‘ridan-to‘g‘ri demokratiyaning eng muhim instituti ekanini, davlat va har bir fuqaro uchun muhim bo‘lgan qarorlarni qabul qilishda xalqning bevosita ishtirokini ifodalashini taʼkidladi va andijonliklarni 30 aprelga belgilangan Referundumda faol ishtirok etishga chaqirdi.