Bitta modda bilan aholiga 11 trillion ajratilmoqda

Xivaliklar Konstitutsiyaviy islohotlarni qo‘llab-quvvatlamoqdalar. Oliy Majlis Qonunchilik palatasi deputati Jumanazar Otajonov xivalik saylovchilar bilan uchrashuvda konstitutsiyaviy islohotlar jarayonida “Milliy tiklanish” demokratik partiyasi faollari va elektorati tomonidan taqdim etilgan takliflarning aksariyati yangilanayotgan Konstitutsiyadan joy olganini taʼkidladi.

– Misol uchun, 61-moddada tarixiy, maʼnaviy, madaniy, ilmiy va tabiiy meros davlat tomonidan muhofaza qilinishi belgilanyapti. Amaldagi Konstitutsiyada esa faqat madaniyat yodgorliklari davlat muhofazasida ekani belgilangan edi. Aynan ushbu o‘zgarish tarixiy shahar aholisi – xivaliklarning uzoq yillardan buyon yuragida saqlab kelayotgan og‘riqlariga malham bo‘ladi, – dedi J.Otajonov.

Urganchda “Referendum-2023: Kelajaging uchun ovoz ber!” shiori ostida o‘tkazilgan targ‘ibot tadbirida esa Oliy Majlis Qonunchilik palatasi deputati Muborak Ahmedova o‘z saylovchilari bilan uchrashib, yangi tahrirdagi Konstitutsiyada har kim ishsizlikda ijtimoiy taʼminot olish huquqiga ega ekani mustahkamlanayotgani, pensiya, nafaqa va boshqa ijtimoiy yordamning miqdorlari eng kam isteʼmol xarajatlaridan oz bo‘lishi mumkin emasligi belgilanayotgani haqida maʼlumot berdi.

– Bu hozirning o‘zida 2 million 200 ming ehtiyojmand oilalar davlatdan kafolatli moddiy yordam oladi, deganidir. Ayni xarajatlar uchun har yili 11 trillion so‘m ajratish ko‘zda tutilgan, – dedi quyi palata deputati.