Konstitutsiyaviy islohotlarga qashqadaryoliklar ham befarq emas

Qariyb uch yarim million fuqaro istiqomat qilayotgan Qashqadaryoda barcha soha va tizimlarda sezilarli o‘zgarishlar amalga oshirilayotgani oddiy odamlar hayotida aks etmoqda. Tahlilchilarning fikricha ayniqsa, iqtisodiyotdagi o‘zgarishlar salmoqli. Bu keyingi besh yilda viloyat iqtisodiyotiga 10 milliard dollar investitsiya jalb qilingani, tadbirkorlar soni 2,5 baravarga ko‘payib, qo‘shimcha 325 mingta doimiy ish o‘rni yaratilganida ham ko‘rinib turibdi. Joriy yilda esa viloyatga 1,5 milliard dollar investitsiya jalb qilinib, 440 ming aholini daromadli ish bilan taʼminlash belgilangan.

Oliy Majlis Qonunchilik palatasi deputatlari Farhod Zayniyev va Jamshid Qosimovlarning Qarshi shahri hamda Qamashi tumanidagi saylovchilar bilan uchrashuvlarida anashu raqamlar tilga olindi. Uchrashuvda shuningdek, Konstitutsiyaviy qonun loyihasi haqida fikr yuritildi. Yangi O‘zbekistonda “Inson qadri uchun” g‘oyasi asosidagi o‘zgarishlarni qashqadaryoliklar ham o‘z hayotida his qilayotgani taʼkidlandi.

Bunday o‘zgarishlarning huquqiy asosini yaratish bo‘yicha mamlakatimizda boshlangan Konstitutsiyaviy islohotlarga qashqadaryoliklar ham befarq emaslar. Shu bois, uchrashuvlarda viloyat ahlining Referendumda faol ishtirok etishi yuzasidan daʼvatlar yangradi.