Sog‘likdan buyuk neʼmat yo‘q dunyoda

Sog‘lik inson hayoti uchun eng zarur neʼmatdir. Shu bois, yangilanayotgan Konstitutsiyada aholining bepul tibbiy xizmatlardan foydalanishi yangi norma bilan kafolatlanyapti. Bu mamlakatimizda ushbu soha davlatimiz ijtimoiy siyosatining eng ustuvor yo‘nalishiga aylanganini ko‘rsatadi. Umuman, loyihada aholi salomatligini asrash bilan bog‘liq normalar 4 barobar ko‘paytirilmoqda.  Bu xalqimiz sog‘lig‘ini ishonchli muhofaza etish hamda onalar va bolalar o‘limi, yuqumli kasalliklar tahdidini bartaraf etishda muhim ahamiyat kasb etadi.

Qoraqalpog‘iston Respublikasining Amudaryo tumanida tashkil etilgan navbatdagi tadbirda Oliy Majlis Qonunchilik palatasi deputati Zumrad Bekatova ishtirok etib, sog‘liqni saqlash tizimida so‘nggi yillarda amalga oshirilgan islohotlar haqida gapirib, endi Bosh Qomusimizda bunday o‘zgarishlarning huquqiy asoslari yaratilayotganini qayd etdi.

– Shuningdek, loyihada homiladorligi yoki bolasi borligi bilan bog‘liq sabablarga ko‘ra ayollarni ishga qabul qilishni rad etish, ishdan bo‘shatish va ularning ish haqini kamaytirish taqiqlanishi belgilanmoqdaki, bular mamlakatimizda gender tengligi prinsiplari to‘laqonli amal qilishiga olib keladi. Shu bois, barcha xotin-qizlarni 30-aprel kuniga belgilangan Referendumda faol ishtirok etishga chaqiraman, - dedi deputat.