“Propiska” muammosiga butunlay barham berilmoqda

Konstitutsiyaviy qonun loyihasi bo‘yicha Quvasoy shahrida o‘tkazilgan targ‘ibot tadbiri ishtirokchilari konstitutsiyaviy islohotlar mazmun-mohiyati, referendum jarayonlari haqida batafsil maʼlumotga ega bo‘ldilar.

Bu haqida Oliy Majlis Qonunchilik palatasi deputati Jahongir Mamajonov chiqish qilib, inson huquq va erkinliklari kafolatlari sezilarli darajada kuchaytirilayotganini qayd etdi.

Taʼkidlanganidek, har bir shaxsning respublika hududida erkin harakatlanishi, turar va yashash joyini erkin tanlash huquqi, respublikadan tashqariga chiqish huquqi hamda O‘zbekiston fuqarolarining mamlakatimizga moneliksiz qaytish huquqi belgilanmoqda.

– Mazkur konstitutsiyaviy qoida bilan erkin harakatlanish oliy huquqiy norma sifatida mustahkamlanmoqdaki, bu “propiska” tizimi muammosiga ham barham beradi, – dedi Jahongir Mamajonov.