“Nevaralarimga nasib qilgan baxt”

Oliy Majlis Qonunchilik palatasi deputati Abdumalik Akromovning “Deputat so‘rovi” asosida Pop tumanining “Yuksalish” mahallasida zamonaviy talablar asosida uch qavatli maktab qurilayotgani haqida xabar bergan edik.

Nihoyat qishloq ahli sabrsizlik bilan kutgan kun keldi. Mutlaqo yangicha loyiha asosida qiymati qariyb 14 mlrd so‘mga baholangan maktab foydalanishga topshirildi.

– Bir vaqtlar men orzu qilgan mana shunday muhtasham zamonaviy maktab bugun nevaralarimga nasib qildi, – deydi maktabning ochilish marosimida ishtirok etgan mahalla nuroniysi Xoldarvoy ota Dolimov.

170 o‘ringa mo‘ljallangan bo‘lsada, amalda 260 o‘quvchi tahsil olgan 48-sonli maktabning eski binosi o‘rnida bir paytlar xo‘jalikning kimyoviy dorilar saqlanadigan ombori bo‘lgan edi. Qariyb 40 yil oldin qo‘shimcha binolar qurilib, ombor maktabga aylantirilgandi. Kimyoviy dorilar taʼsiri, ayniqsa, issiq kunlari sezilib turar, maktab devorlari esa borgan sari nurab borayotgandi.

330 o‘ringa mo‘ljallangan yangi maktab qurilishi ancha yillar oldin boshlangan, lekin moliyaviy muammolar sabab, bir qavati qurilib, to‘xtab qolgan edi. A.Akromov aholining murojaatidan so‘ng ushbu masalani yana ko‘tarib, vazirning nomiga so‘rov chiqardi va davlat dasturiga kiritishga erishdi.

– Zamonaviy maktabning Konstitutsiyaviy islohotlar jarayonida foydalanishga topshirilishi ustozlar uchun qo‘shaloq bayram bo‘lmoqda. Zero, yangilanayotgan Bosh Qonunda taʼlim va ilm-fanga oid normalar qariyb 2 barobarga ko‘paytirilib, davlatning o‘qituvchilar shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan o‘sishi to‘g‘risida g‘amxo‘rlik qilish majburiyati kuchaytirilmoqda. Bundan ko‘rinib turibdiki, taʼlim-tarbiya ishlari davlatning har doimgi ustuvor vazifasi bo‘lib qoladi, – dedi maktabning ochilish marosimida Abdumalik Akromov.