“Biz Yangi O‘zbekiston islohotlariga befarq emasmiz!”

Toshkent shahri:

Ichki ishlar tizimidagi mehnat faxriylari ishtirokida Konstitutsiyaviy qonun loyihasi mazmun-mohiyatiga bag‘ishlangan tadbirda ishtirok etgan Oliy Majlis Qonunchilik palatasi deputati Jahongir Shirinov yurtimizda “Inson qadri uchun” tamoyili asosida amalga oshirilayotgan saʼy-harakatlarda nuroniy va mehnat faxriylarining ham o‘rni beqiyos ekanini taʼkidladi.

– Yangilanayotgan Konstitutsiyaga faxriylarimizdan ham ko‘plab takliflar kelib tushdi. Nuroniylarimizning boy hayotiy tajribadan kelib chiqib bildirgan takliflarining aksariyati loyihada aks ettirildi, – dedi Qonunchilik palatasining Korrupsiyaga qarshi kurashish va sud-huquq masalalari qo‘mitasi raisi.

Tadbirda so‘zga chiqqan faxriylar ham Yangi O‘zbekiston islohotlariga befarq emasliklarini, yosh avlodni tarbiyalash, mahallalarda sog‘lom muhitni shakllantirish, oila-turmush masalalaridagi muammolarni hal etishda yanada faol bo‘lishini bildirdilar.