Mamlakatimizning kelgusi taqdirini belgilovchi normalar

Sirdaryo viloyati:

Partiyaning Sirdaryo viloyati Kengashi tomonidan Konstitutsiyaviy qonun loyihasi targ‘iboti bo‘yicha Guliston shahrida o‘tkazilgan tadbirlarda yoshlar, xotin-qizlar hayoti bilan bog‘liq kiritilayotgan o‘zgarishlar haqida gap bordi.

Taʼkidlaganidek, 2040-yilga borib mamlakatimiz aholisi 50 millionga yetishi va yarmidan ko‘pini yoshlar tashkil qilishi kutilmoqda. Ularga munosib sharoit yaratish, shubhasiz, mustahkam huquqiy poydevorni taqozo etadi. Shu bois, davlat yoshlar huquqlarini himoya qilishni, ularning jamiyat va davlat hayotida faol ishtirokini rag‘batlantirishni kafolatlanmoqda. Jumladan, yoshlarning taʼlim olishi, ijtimoiy va tibbiy himoyasi, uy-joyli bo‘lishi, bandligi uchun shart-sharoitlar yaratish – davlatning konstitutsiyaviy majburiyati sifatida belgilanyapti.

– Yangilanayotgan Konstitutsiyada xotin-qizlarning taʼlim olishi, ilm-fan bilan shug‘ullanishi uchun shart-sharoit yaratish ham davlatning alohida vazifasiga aylanyapti. Davlat shu orqali o‘z zimmasiga muhim majburiyatlarni olmoqdaki, mazkur normalar, nafaqat ayollar manfaati, balki butun jamiyatimiz va mamlakatimizning kelgusi taqdiri uchun muhimdir, – dedi targ‘ibot tadbirlarida ishtirok etgan partiya Markaziy kengashi raisi o‘rinbosari Feruza Muhammadjonova.