Taxiatosh tumanida mahalliy deputatlar bilan uchrashgan Feruza Muhammedjanova Prezident raisligida kambag‘allikni qisqartirish va aholi bandligi masalasida o‘tkazilgan videoselektor yig‘ilishi mazmun-mohiyatini muhokama qildi. So‘ngra tuman Kengashi deputati Bazargul Daubayeva tashabbusi bilan maktablarga xo‘jalik ishlariga joylashtirilgan 3 nafar fuqaro bilan uchrashdi.

Shuningdek, tikuvchilik bilan shug‘ullanayotgan 1-guruh nogironi, 2 nafar farzandni voyaga yetkazayotgan Amangul Qurbaniyazova xonadonida bo‘ldi. Ro‘zg‘or tebratishga qiynalib qolgan ayolga deputat yordami bilan tikuv mashinasi olib berilgan edi. Bugun tikuvchilikdan yaxshi daromad topayotgan yolg‘iz ayol yoshlarga hunar o‘rgatib, tadbirkorligini yanada kengaytirish harakatiga tushgan. “Ishsizlarni ish bilan taʼminlaganimiz yaxshi, lekin ularning keyingi faoliyatidan ham doimo xabardor bo‘lib turishimiz lozim”, dedi Markaziy kengash raisi o‘rinbosari.