Markaziy kengashda Konstitutsiya qabul qilinganining 33 yilligi munosabati bilan yoshlar o‘rtasida “Siyosat maydoni” intellektual ko‘rik-tanlovining ochilish marosimi bo‘lib o‘tdi.

Talabalarning huquqiy-siyosiy ongini yuksaltirish, ularda bahs va muloqot madaniyatini shakllantirish, davlat va jamiyat hayotida faol ishtirokini taʼminlash, bir so‘z bilan aytganda, siyosatchilarning yangi avlodini tarbiyalash maqsadida tashkil etilayotgan tanlov ikki bosqichda o‘tkaziladi. Tanlov asosan Jahon iqtisodiyoti va diplomatiya universiteti, O‘zbekiston xalqaro islom akademiyasi, O‘zbekiston jurnalistika va ommaviy kommunikatsiyalar universiteti, O‘zbekiston milliy universiteti, Toshkent davlat sharqshunoslik universiteti, Toshkent davlat yuridik universiteti hamda  O‘zbekiston davlat jahon tillari universiteti talabalari ishtirokida o‘tkaziladi.

Tadbirda tanlovni keng targ‘ib qilish, unda faol qatnashgan va g‘olib bo‘lgan yoshlarni partiya tomonidan kelgusida deputatlikka nomzod sifatida ko‘rsatish, shuningdek, partiya faoliyatida bo‘lajak mutaxassislarning g‘oya va maqsadlaridan amalda foydalanish bo‘yicha taklif va tashabbuslar ilgari surildi. O‘zbekiston Prezidenti Shavkat Mirziyoyevning 2025-yil 13-noyabrda eʼlon qilingan “Markaziy Osiyo yangi davr ostonasida” maqolasining siyosiy tahlili bo‘yicha taqdimot ham namoyish etildi.

Tanlov ekspertlari taʼkidlaganidek, bugungi kunda professional siyosatshunoslarga bo‘lgan ehtiyoj tobora ortib bormoqda. Dunyodagi eng qudratli davlatlar, avvalo, keng qamrovli va yuksak malakali siyosiy elitaga ega davlatlardir. O‘zbekiston oldida turgan muhim vazifalardan biri ham zamonaviy, professional va keng qamrovli milliy siyosiy elitani shakllantirish ekan, bu borada “Siyosat maydoni” tanlovi muhim qadam bo‘ladi.

Maʼlumki, 2023-yilgi tanlovning birinchi mavsumida 1500 nafardan ziyod talabalar ishtirok etgan bo‘lib, ular orasidan 36 nafar yoshlar respublika bosqichiga saralab olingan edi. Ushbu bosqich ishtirokchilari tomonidan ilgari surilgan 10 dan ortiq takliflar “Milliy tiklanish” demokratik partiyasining 2025-2029 yillarga mo‘ljallangan Saylovoldi dasturiga vazifa sifatida kiritildi. Shuningdek, respublika bosqichi ishtirokchilari tashabbusi bilan “Siyosat maydoni” yosh siyosatchilar klubi tashkil etilgan bo‘lib, u bugungi kunda ham o‘z faoliyatini davom ettirmoqda.

Hamdam NIYOZOV,
partiya Markaziy kengashi
bo‘lim boshlig‘i