Yangiliklar


61

O‘zgarishni avvalo o‘zimizdan boshlaylik!

Har bir mamlakat tarixida shunday bir shiddatli, yangiliklarga boy davrlar bo‘ladiki, uning o‘tgan, o‘tayotgan lahzalari qadrini baholamoqchi bo‘lsak, u hech qanday o‘lchov va mezonlarga sig‘maydi. Biz bugun ana shunday tezkor, shiddatli, ishchan davrda yashayapmiz. Turg‘unlik, loqaydlik hissiyotidan uzoqlashgan xalqimiz ruhiyatidagi siyosiy uyg‘oqlik, fikriy yuksalish, faollik va harakatchanlikka guvoh bo‘lyapmiz. Quvonarlisi, mamlakatimiz ham tezkor zamonamiz shiddatiga monand rivojlanmoqda.

Barcha sohalarda bo‘lgani kabi milliy tovarlar raqobatbardorligini oshirish, soha rivojida zamonaviy marketing konsepsiyalaridan foydalanish borasida ham keng ko‘lamli  islohotlar amalga oshirilmoqda. Jumladan, ichki bozorni himoya qilish va tashqi bozorga faol kirib borishga qaratilgan marketing strategiyalarini ishlab chiqish, bu borada  raqobatbardoshlikni oshirishdagi mavjud muammo va ishlamayotgan imkoniyat, zahiralarni chuqur tahlil qilish asosida yangi tamoyil va usullar joriy etilmoqda.

Shuningdek, ichki va tashqi bozorlarni milliy mahsulotlar bilan to‘ldirishga munosib hissa qo‘shayotgan tadbirkorlik subyektlarini qo‘llab-quvvatlashga ham alohida eʼtibor qaratilyapti. Ularning huquq va qonuniy manfaalarini himoya qilishga oid bir qator qarorlar qabul qilindiki, shu kunlarda “O‘zbekistonda ishlab chiqarilgan” tamg‘asi ostidagi ko‘plab mahsulotlarimiz dunyo bozorlarini ham zabt etmoqda. Avvallari dunyo bozorlari uchun xomashyo manbai hisoblangan mamlakatimizning bugun tayyor mahsulotlar eksporti tobora kengaymoqda.

Prezidentimizning 2020 yil 11 avgustdagi “Kambag‘al va ishsiz fuqarolarni tadbirkorlikka jalb qilish, ularning mehnat faolligini oshirish va kasb-hunarga o‘qitishga qaratilgan hamda aholi bandligini taʼminlashga oid qo‘shimcha chora-tadbirlar to‘g‘risida”gi qarori ham tadbirkorlik subyektlari faoliyatini yana-da jonlantirish  imkonini berdi. Hunari orqali daromadli bo‘lgan minglab yurtdoshlarimiz kambag‘allar ro‘yxatidan, “Temir daftar”dan chiqarildi. Quvonarlisi, faoliyatini yana-da kengaytirayotgan ko‘plab tadbirkorlarga endi yurtimiz bozorlari torlik qilib qoldi. O‘zbekistonda ishlab chiqarilgan mahsulotlarga bo‘lgan talab esa kundan kunga oshmoqda.

Mamlakatimiz rahbari Shavkat Mirziyoyev inauguratsiya marosimidagi nutqida ham aholi daromadini oshirishning asosiy omili xususiy sektorni rag‘batlantirish, uning ulushini oshirib, to‘g‘ridan-to‘g‘ri xorijiy investitsiyalarni jalb etish,  “xomashyodan – tayyor mahsulotgacha” degan tamoyil asosida drayver sohalarda klaster tizimini rivojlantirish ekanini taʼkidlagan edilar.

“Bugungi jamiyatdagi manzara tafakkuringiz mahsuli. Bundanda yaxshiroq yashashni xohlaysizmi,  marhamat, tafakkuringizni o‘zgartiring”,  – deb yozgan edi Eynshteyn. Darhaqiqat, bugun avlodlar yangilanyapti, zamon shiddat bilan o‘zgaryapti. Demak, zamonaga mos bo‘lish uchun inson ham o‘zgarishi, tafakkurini o‘zgartirishi kerak. O‘zgarishni esa avvalo qarashlarimizni o‘zgartirishdan boshlanadi.

Yurtimizda ishlab chiqarilgan mahsulotlarga past nazar bilan qarashimiz ayni haqiqat. Narxi qimmatmi, xorijnikimi, demak, bu yaxshi mahsulot degan qarash ongimizga singib ketgan. Vaholanki, mahalliy mahsulotlarimiz sifat jihatdan ham, tarkibi jihatidan ham  xorijnikida aslo kam emas. “Oldingdan oqqan suvning qadri yo‘q” deganlaridek, biz ularning qadrini bilmaymiz, xolos.

Xizmat yuzasidan Rossiyada bo‘lib qaytgan bir tanishim u yerdan olib kelgan  kiyimlari sifatini maqtay ketdi. Oradan hech fursat o‘tmay o‘sha tanishim bilan bir davrada yana uchrashib qoldik. Milliy mahsulotlarimiz haqida gap aylanib qolgandi, tanishim menga yuzlanib: “Tunov kuni sizga Rossiyadan olib kelgan kiyim-kechaklarimni maqtagandim-ku, o‘sha kiyimlar aslida o‘zimizning mahsulot ekan. Yorlig‘iga qaramagan ekanman. Milliy mahsulotlarimiz chet ellarda shunchalik xaridorgir ekanligidan quvondim”, – dedi mamnuniyat bilan.

Dunyo ko‘rgan taniqli bir shoiramiz shunday  fikrni aytib qoldi: “Ozarbayjonliklar o‘z yurtida yetishtirilgan mevalarni behad qadrlashar ekan. Ularning narxi ham xorijdan keltirilgan mevalarga nisbatan ancha qimmat baholanarkan. Sababini so‘raganimizda, bobo-dehqonlarimiz mehr bilan parvarishlagan, o‘z yurtimiz tuprog‘ida quyoshimizdan bahra olib, suvimizga qonib pishib yetilgan mevalarni bexavotir isteʼmol qilamiz. Xorijdan keltirilgan mevalarning esa qay tarzda yetishtirilgani, bizgacha yetib kelishida sifati buzilmasligi uchun ularga  qanday ishlov berilgani bizga qorong‘u, deb javob berishdi”.

Qani edi xalqimizda ham milliy mahsulotlarimizga nisbatan shunday qarash shakllansa. Zero,  milliy mahsulotimiz milliy g‘ururimizdir.

 

Feruza JALILOVA,

“Milliy tiklanish” demokratik partiyasi

Markaziy kengashi bo‘lim boshlig‘i