Surxondaryoning Qumqo‘rg‘on tumanida o‘rganishlar olib borayotgan deputat Abdulhakim Eshboyev bu safar asosiy eʼtiborni taʼlim tashkilotlarida darsliklar taʼminoti, kutubxona va maktab oshxonalari faoliyatiga qaratgani bejiz emas. Fraksiya yig‘ilishlarida doimo ushbu masalalar, jumladan, darsliklar o‘z vaqtida yetkazilmayotgani bilan bog‘liq muammoga e'tibor qaratiladi. Vazirlik vakillari esa “harakat qilyapmiz” degan gapdan nariga o‘tmaydi.

Tumandagi 70-sonli maktab faoliyatini o‘rgangan deputat bu borada hamon “eski tos, eski hammom”ligiga guvoh bo‘ldi. Yana bir oydan so‘ng ikkinchi chorak yakunlanadi. O‘quvchilar ayrim darsliklar, masalan, tarix kitobi bilan taʼminlanmagan. Maktab oshxonasida esa mumkin bo‘lmagan mahsulotlar – “chips”, “kiriyeshki” va gazlangan rangli ichimliklar bemalol sotilyapti. Bunday holatlar tumandagi boshqa maktablarda ham aniqlandi.