Yurtimizning barcha hududlarida bo‘lgani kabi Samarqand viloyatida ham keyingi yillarda sezilarli ijobiy o‘zgarishlar yuz bermoqda, olib borilayotgan islohotlar samaralari yaqqol ko‘zga tashlanmoqda. Samarqand nafaqat tarixiy va ma’naviy merosimizning markazi, balki iqtisodiyot, turizm, ilm-fan hamda xalqaro hamkorlikning bugungi kunda jadal rivojlanib borayotgan hududiga aylandi.

So‘nggi yillarda viloyatga jalb etilgan investitsiyalar hajmining oshishi, sanoat va xizmatlar sohasi kengaygani, infratuzilma yanada zamonaviylashgani — bularning barchasi davlat siyosatining amaliy natijasidir.

Prezidentimizning Samarqandga amalga oshirgan bu galgi tashrifi ham viloyatning ijtimoiy-iqtisodiy rivojlanishida yangi bosqichni boshlab bergani bilan ahamiyatli bo‘ldi, desak mubolag‘a bo‘lmaydi. Tashrif doirasida turizm infratuzilmasini rivojlantirish, xususan “Boqiy shahar” majmuasi, xalqaro aeroport, mehmonxona tarmoqlari va ziyoratgohlarni yangilash bo‘yicha amalga oshirilgan ishlar yuqori baholandi. Bu esa nafaqat viloyat, balki mamlakatimizning xalqaro maydondagi imijini mustahkamlashga xizmat qiladi.

Qishloq va suv xo‘jaligi, sanoatni modernizatsiya qilishga doir berilgan topshiriqlar esa viloyat aholisining hayot sifatini oshirishga bevosita xizmat qiladi. Endilikda viloyatdagi fermerlar uchun tomchilatib va yomg‘irlatib sug‘orishni joriy qilishga beriladigan kredit foizi 14 dan 10 foizga tushiriladi, paxta maydonlarining har bir gektari uchun 12 million so‘mgacha subsidiya beriladi.

Shuningdek, Urgut tumanining sanoat tajriba maydoni sifatida rivojlantirilishi, yirik investitsion loyihalarning yo‘lga qo‘yilishi, yangi ish o‘rinlarining yaratilishi — bularning barchasi viloyatning kelgusi o‘sishiga xizmat qiladigan strategik qarorlardir. Urgutdagi mahallalar infratuzilmasiga kelasi yil 260 milliard so‘m ajratilishi e’lon qilindi. Tumanning 8 ta mahallasi infratuzilmasini yaxshilashga Islom taraqqiyot bankidan 10 million dollar jalb qilinmoqda.

Bundan tashqari, Tojikiston bilan chegaradosh 15 ta mahallada mehmon uyi va dam olish maskani qurishga 10 milliard so‘m resurs yo‘naltirilmoqda. Umuman, 2026 yilda viloyatdagi mahallalarda savdo va servis hisobidan 40 ming ish o‘rni yaratish muhimligi qayd etildi.

Shuni alohida ta’kidlash kerakki, Samarqandning demografik o‘sishi, aholi sonining ko‘payishi sharoitida yangi makonlar, yo‘llar, uy-joylar, maktablar va sog‘liqni saqlash infratuzilmasini kengaytirish bo‘yicha Prezidentimiz tomonidan qo‘yilgan vazifalar vaqtida va sifatli bajarilishi viloyat kelajagi uchun juda muhimdir.

Umuman olganda, davlatimiz rahbarining ushbu tashrifi Samarqand viloyatida olib borilayotgan keng ko‘lamli islohotlarning izchil davom etishidan dalolat beradi. Bu jarayonlarda har bir mas’ul rahbar, tadbirkor, ziyoli va fuqarodan yuksak mas’uliyat, faollik va tashabbuskorlik talab etiladi. Biz deputatlar yurtboshimiz tashriflari davomida ilgari surgan sa’y-harakatlarni to‘liq qo‘llab-quvvatlagan holda bu kabi ezgu maqsadlarni ro‘yobga chiqarishda o‘z hissamizni qo‘shamiz.

Sayyora JUMAYEVA,

Oliy Majlis Qonunchilik palatasi deputati