O‘zbekiston Prezidentining 20-noyabr kuni qabul qilingan Turizm qo‘mitasi faoliyatini tashkil etish va bu sohani jadal rivojlantirishga qaratilgan yangi qarorida sohani iqtisodiyotning strategik tarmog‘i sifatida tizimli va barqaror rivojlantirish bo‘yicha yangi vazifalar belgilandi.

Jumladan, 2030-yilgacha turizmning YAIMdagi ulushini amaldagi 3,5 foizdan 7 foizga, xorijlik sayyohlar soni 20 mln nafarga yetkaziladi. Turizm xizmatlari yillik eksporti esa 6 mlrd AQSH dollaridan oshiriladi. O‘zbekistonning turistik shaharlari o‘rtasidagi transport bog‘lanishni yaxshilash maqsadida ichki aviaqatnovlar soni ko‘paytiriladi va bu orqali yo‘lga sarflanadigan vaqt kamida 3 baravarga qisqartiriladi. Shuningdek, 4 va 5 yulduzli mehmonxonalar sonini 2 baravarga oshirish, turistik xizmatlar va mahsulotlarni diversifikatsiya qilish orqali respublikaning turistik salohiyatini to‘liq ishga solish hamda jahonda keng taniladigan O‘zbekistonning turistik brendini yaratish, milliy turistik mahsulotlarni ommalashtirish uchun yangi instrumentlarni joriy etish maqsad qilindi.

Farmon bilan Turizm qo‘mitasiga tegishli vazirlik va idoralar hamkorligida O‘zbekistonga kirish uchun vizasiz rejim joriy etiladigan davlatlar ro‘yxatini kengaytirish, respublikaning turizm-transport logistikasini rivojlantirish, turizm sohasini 2040-yilgacha rivojlantirish hamda 2030-yilgacha mo‘ljallangan turistik xizmatlar bozorlarida marketing strategiyasi bo‘yicha taklif va tegishli hujjatlar loyihalarini ishlab chiqish vazifasi yuklatildi.

Hujjatda turistik startaplarga 1 mlrd so‘mgacha subsidiya ajratilishi, mehmonxonalarga “yashil” sertifikat olish xarajatlarining yarmini davlat qoplab berishi, xalqaro tadbirlar o‘tkazib, kamida 100 nafar chet ellik sayyohni olib kelgan kompaniyalarga tadbirlar uchun to‘langan QQSning yarmi qaytarib berilishi belgilandi. Eng nufuzli brendlar bilan kelishgan holda mehmonxona qurayotgan tadbirkorlarga esa bojxona imtiyozi beriladi.

Ushbu sohaning so‘nggi yillardagi rivojini statistik raqamlarda ko‘radigan bo‘lsak, o‘tgan yili turizm va unga yondosh sohalarda 51 mingga yaqin ish o‘rni yaratildi. Xorijiy sayyohlar soni esa 10 mln nafardan oshdi. Bu o‘tgan yilning mos davriga nisbatan 1,5 barobarga ko‘p.

Joriy yilning 9 oyida ham ijobiy ko‘rsatkichlar qayd etildi. Xorijlik sayyohlar soni 8,6 mln nafardan oshdi. Turistik xizmatlar eksporti esa rekord darajaga – 3,6 mlrd dollarga yetdi. Agar har oyda yurtimizga 1 mln dan ortiq sayyoh kelayotganini eʼtiborga olsak, bu yilgi 15,8 millionlik reja, albatta, uddalanadi.    

O‘zbekistonda turizm rivoji bo‘yicha xorijiy eʼtiroflar haqida gap ketganda, yaqinda Samarqandda o‘tkazilgan YUNESKO Bosh konferensiyasining so‘nggi 40 yilda ilk bor Parijdan tashqaridagi o‘tkazilgan sessiyasini alohida misol sifatida keltirish lozim. Ikki hafta davom etgan anjumanda 200 dan ortiq davlatdan 5000 ga yaqin delegat ishtirok etdi. Mehmonlar nafaqat Samarqand, balki Buxoro, Xiva, Shaxrisabz kabi tarixiy shaharlarimizning turizm imkoniyatlari bilan ham tanishib, yaqin yillarda O‘zbekiston turizmi rivojlangan eng oldi davlatlar qatoriga qo‘shilishiga ishonch bildirdi. Shu maʼnoda, nufuzli konferensiyani dunyoga yurtimizning turistik imkoniyatlarini ko‘rsatishda ham muhim ahamiyatga ega bo‘lgan tadbir sifatida baholasak to‘g‘ri bo‘ladi.

Yana bir eʼtirof: Butunjahon turizm tashkiloti O‘zbekistonni 2024-yil “Turizmni rivojlantirish bo‘yicha dunyoning eng faol mamlakati” deb eʼlon qildi. Mamlakatimiz 2019-2024 yillar oralig‘ida turizm va sayohatlar uchun sharoitlarni yaxshilashda eng katta taraqqiyotga erishgan 10 ta davlat qatoridan ham joy oldi.

Demak, dunyo tajribasi turizm iqtisodiyotning eng jadal rivojlanayotgan sohalaridan biri ekanligini ko‘rsatayotgan ekan, yurtimizda sayyohlik rivojining yangi bosqichini taʼminlaydigan Prezident farmoni haqiqatan ham O‘zbekistonni yaqin yillarda turizm davlatiga aylanishiga xizmat qiladi.

Abdulhakim ESHBOYEV,

Oliy Majlis Qonunchilik palatasi deputati