Andijonning Ulug‘nor tumanida o‘rganishlar olib borgan deputat Umida Rahmonova asosiy eʼtiborni bandlik masalasiga qaratdi va qiziq holatga duch keldi. Tumandagi sanoat zonasida faoliyat ko‘rsatayotgan tadbirkorlar deputatga ishchilar yetishmayotganini maʼlum qilgan bo‘lsa, mahalladagi uchrashuvlarda aholi ishsizlar soni ko‘pligidan shikoyat qilishdi.

“Haqiqatan ham qiziq holat: tadbirkorlar ishchi qidirish bilan, ishsizlar esa ish qidirish bilan ovvora. Bu mahalla ”yettiligi”ning ishi qoniqarsiz ekanidan, mahalliy deputatlar bandlik masalasiga yetarlicha eʼtibor qaratmayotganidan dalolat. Muammo ish haqida ham emas. Tadbirkorlar taklif etayotgan maosh miqdori ham yomon emas”, – deydi deputat. Shuningdek, Umida Rahmonova davlat bog‘chalarida ovqatlantirish va kuz-qishga tayyorgarlik masalalarini ham o‘rgandi.