Konstitutsiya – yetuk kadrlar tayyorlash kafolati

Sirdaryo viloyati

So‘nggi olti yilda oliygohlar soni 77 tadan 210 taga, qabul 5 baravarga, talabalar soni 1 millionga, oliy taʼlim qamrovi esa 9 foizdan 38 foizga oshdi. Umuman, yangilanayotgan Konstitutsiyada taʼlim va ilm-fanga oid normalar qariyb 2 barobarga ko‘paytirilmoqda.

Konstitutsiyaviy qonun loyihasi bo‘yicha gulistonlik yoshlar bilan uchrashgan Oliy Majlis Qonunchilik palatasi deputati Sherzod Qulmatov yangi tahrirdagi Bosh Qonunga yoshlar va oliy taʼlim bo‘yicha kiritilgan normalar bilan tanishtirib, ushbu  maʼlumotlarni keltirdi.

Partiyaning viloyat Kengashi raisi Norbobo Soatov ham ushbu masalada so‘zga chiqib, 2017-yilgacha oliygohlarda o‘qish uchun davlat grantlari soni faqat qisqarib kelgan bo‘lsa, oxirgi olti yilda grantlar soni 2 baravar ko‘payib, 40 mingtaga yetgani va magistratura uchun esa 5 baravarga ko‘payganini taʼkidladi.

– Bunday o‘zgarishlar yoshlarimizning ijtimoiy, maʼnaviy va axloqiy farovonligi, jismoniy va ruhiy sog‘lom bo‘lishi, eng asosiysi, kelajakda xalqimizga nafi tegadigan yetuk kadrlar bo‘lib yetishishida muhim ahamiyat kasb etadi, – dedi Norbobo Soatov.