O‘zbekistonda yoshlar siyosati har doim ustuvor bo‘lib qoladi

Namangan viloyati:

Partiyaning Namangan viloyati Kengashi tashabbusi bilan Namangan muhandislik-texnologiya institutida "Yangi Konstitutsiya – o‘zligimiz, ona tilimiz, milliy qadriyat va anʼanalarimiz himoyachisi" mavzusida targ‘ibot tadbiri tashkil etildi. Tadbirda partiyaning viloyat Kengashi raisi Dilnoza Azizova hamda xalq deputatlari viloyat Kengashi deputati, institut rektori Odiljon Mamatkarimovlar so‘zga chiqib, talabalarni Konstitutsiyaviy qonun loyihasi mazmun-mohiyati bilan tanishtirdi.

Taʼkidlanganidek, ayni paytda aholimizning 18 milliondan ortig‘ini yoshlar tashkil etadi va ushbu ko‘rsatkich 2040-yilga borib, 25 millionga yetishi kutilyapti. Kelajagimiz egalariga munosib sharoit yaratish uchun esa barqaror iqtisodiyot, xavfsiz davlat, samarali boshqaruv, ijtimoiy kafolatlar bo‘lishi lozim. Yangilanayotgan Konstitutsiya aynan yoshlar hayoti bilan bog‘liq masalalarni yechishda ham muhim ahamiyat kasb etadi.

– Yangilanayotgan Konstitutsiyada yoshlar masalasi alohida bob darajasiga olib chiqilgani Yangi O‘zbekistonda yoshlar siyosati har doim ustuvor bo‘lib qolishiga yaqqol ishoradir, – dedi Dilnoza Azizova.