Yangiliklar


266

Maqsad jahon bozorida mustahkam o‘rin egallash

Mamlakatimizda bugungi kunda sanoat korxonalari eksportini kengaytirish va yanada rivojlantirish masalalariga alohida eʼtibor qaratilib, korxonalarning eksport salohiyatini oshirish, tashqi bozorlarga tayyor raqobatbardosh mahsulotlar bilan chiqish, eksportda qo‘shimcha qiymatga ega tovarlar ulushini ko‘paytirish hamda jahon bozorida mustahkam o‘rin egallash bo‘yicha iqtisodiy islohotlar jadal olib borilmoqda. Xususan, qishloq xo‘jaligi sohasida oziq-ovqat mahsulotlarini yetishtirish bo‘yicha O‘zbekiston imkoniyatlari yuqori salohiyatli mamlakatlar qatorida turadi.

Keyingi yillarda yurtimizda qishloq xo‘jaligi samaradorligini tubdan oshirish va uni diversifikatsiya qilishda klaster tizimi g‘oyat muhim o‘rin egalladi. Natijada, paxta-to‘qimachilik, g‘allachilik, meva-sabzavotchilik tarmoqlari sifat va daromad jihatidan izchil o‘sib borayotganini kuzatish mumkin. Bunga birgina paxtachilik tarmog‘ida xomashyoni qayta ishlash orqali hozirda daromad uch barobarga oshgani misol bo‘la oladi.

Prezident Shavkat Mirziyoyev raisligida 24-noyabr kuni meva-sabzavotchilik va dehqon xo‘jaliklarini rivojlantirish masalalariga bag‘ishlab o‘tkazilgan yig‘ilishda bu boradagi imkoniyat va muammolar, hosildorlik va bandlikni oshirish bo‘yicha dolzarb vazifalar belgilab berildi.

Jumladan, meva-sabzavotchilik tarmog‘ida eksport miqdorini hozirgi 1 milliard 200 ming dollardan 5 milliard dollarga ko‘paytirish mumkinligi qayd etildi. Shu bois, meva-sabzavotchilik klasterlari, dehqon xo‘jaliklari va tomorqachilikni rivojlantirish, ularni moliyalashtirish, agroxizmatlar ko‘lamini kengaytirish bo‘yicha yangi tizim joriy etiladi.

Buning uchun meva-sabzavot yetishtiruvchilarga 6 oylik imtiyozli davr bilan 14 foiz stavkada kreditlar ajratiladi. Shu bilan birga, kichik intensiv bog‘, uzumzor va meva-sabzavotchilikni rivojlantirish uchun xalqaro moliya tashkilotlari mablag‘lari hisobidan 14 foizlik imtiyozli stavkada 100 million so‘mgacha garovsiz kredit berish yo‘lga quyiladi. Bundan tashqari, eksport shartnomasi bo‘lgan meva-sabzavot hosilini xavf-xatardan sug‘urtalash xarajatlarining 50 foizi byudjetdan qoplab beriladi.

Xulosa qilib aytganda, oziq-ovqat mahsulotlarini yetishtirish va eksportni rag‘batlantirish qo‘shilgan qiymatga ega bo‘lgan mahsulotlar hajmi va ularni qayta ishlash darajasini oshirishga, bu boradagi ishlarni yana-da rivojlantirishga xizmat qiladi.

 

 

Farhod ZAYNIYEV,

Oliy Majlis

Qonunchilik palatasi deputati