Davlat va nodavlat ta’lim tashkilotlari o‘rtasidagi raqobat yanada kuchayadi

Oliy Majlis Qonunchilik palatasidagi “Milliy tiklanish” demokratik partiyasi fraksiyasining yig‘ilishida “O‘zbekiston Respublikasining Bojxona kodeksiga qo‘shimcha kiritish to‘g‘risida”gi qonun loyihasi ko‘rib chiqildi.

Ta’kidlanganidek, so‘nggi yillarda xalqimiz salomatligi to‘g‘risida g‘amxo‘rlik qilish, ma’naviy va jismoniy barkamol avlodni shakllantirish, sportga aholini, ayniqsa, yoshlarni keng jalb etish bo‘yicha bir qator chora-tadbirlar amalga oshirilmoqda.

Yuqori iqtidorga ega bo‘lgan yosh sportchilarni tanlash, saralab olish tizimi va sport infratuzilmasini yanada rivojlantirish, nodavlat sport-ta’lim tashkilotlarida olimpiya va paralimpiya sport turlari bo‘yicha sportchilarni tayyorlash va ularni davlat tomonidan qo‘llab-quvvatlash, sport musobaqalarning saviyasini yuksaltirish kabi masalalar dolzarb vazifalardan biri bo‘lib qolmoqda.

Shundan kelib chiqib, mazkur qonun loyihasi bilan Bojxona kodeksiga tegishli vazirlik va idoralar tomonidan belgilangan tartibda shakllantirilgan ro‘yxat asosida davlat va nodavlat sport-ta’lim tashkiloti tomonidan xorijdan olib kelinadigan, O‘zbekistonda ishlab chiqarilmaydigan sport kiyimlari va ekipirovkalari hamda oyoq kiyimlari, sport anjomlari, jihozlari va uskunalarini import qilinadigan tovarlarga ma’lum muddatda boj to‘lovlarini kamaytirish belgilanyapti.

Deputatlar bu o‘zgarish mamlakatimizda jismoniy tarbiya va sport sohasida nodavlat ta’lim xizmatlari ko‘rsatishni yanada rivojlantirishga, davlat va nodavlat ta’lim tashkilotlari o‘rtasida sog‘lom raqobat muhitini yaratilishiga xizmat qilishini qayd etib, qonun loyihasini qo‘llab-quvvatladi.

Yig‘ilishda shuningdek, O‘zbekiston Respublikasi Hisob palatasining 2022 yildagi faoliyati to‘g‘risidagi hisoboti ham ko‘rib chiqilib, ma’qullandi.

Alisher QOSIMOV,

partiya Markaziy kengashi bosh mutaxassisi