O‘zbekistonning yanada rivojlanishiga xizmat qiluvchi hamkorlik

Ayni paytda "Milliy tiklanish" demokratik partiyasi fraksiyasining yig‘ilishi boshlandi.

Yig‘ilishni fraksiya rahbari Alisher Qodirov ochib, O‘zbekiston Respublikasi Prezidenti Shavkat Mirziyoyevning Cho‘lponota shahrida o‘tkazilgan "Markaziy Osiyo va Yevropa ittifoqi" yetakchilarining ikkinchi uchrashuvidagi ishtirokiga to‘xtaldi.

Taʼkidlanganidek, O‘zbekistonning YEI davlatlari bilan tovar ayirboshlash hajmi joriy yil boshidan buyon 70 foizga oshdi. Yevropaning yetakchi kompaniyalari ishtirokida mamlakatimiz iqtisodiyotining yuqori texnologik tarmoqlaridagi investitsiya loyihalari portfeli 20 milliard yevrodan ortdi.

Gumanitar sohada Parijdagi Luvr va Berlindagi Yangi muzey bilan hamkorlikda ikkita noyob loyiha amalga oshirildi. Ushbu sanʼat markazlarida ilk bor mintaqamizning boy madaniy-tarixiy merosi keng namoyish etildi.

Markaziy Osiyoning turizm salohiyatidan faol foydalanish maqsadida davlatimiz rahbari mintaqa uchun barqaror turizmni rivojlantirishga ko‘maklashish dasturini birgalikda ishlab chiqish va uni joriy yil oktabr oyida O‘zbekistonda o‘tkaziladigan Jahon turizm tashkiloti Bosh assambleyasining yubiley sammitida taqdim etishni taklif qildi.

Alisher Qodirov shular haqida gapirib, O‘zbekiston uchun Yevropa davlatlari bilan hamkorlikni rivojlantirish muhim ahamiyatga ega ekanini qayd etdi.

– Mamlakatimizning rivojlangan Yevropa davlatlari bilan yaqin hamkorligi O‘zbekistonning yanada rivojlanishiga xizmat qiladi, – dedi fraksiya rahbari.

Yig‘ilishda deputatlar, shuningdek, O‘zbekiston Respublikasi Prezidenti Shavkat Mirziyoyevning Anqara shahrida Turkiya Respublikasi Prezidenti etib qayta saylangan Rejep Tayyip Erdog‘anning inauguratsiya marosimida ishtiroki haqida ham o‘z fikr-mulohazalarini bildirdilar. 

Shundan so‘ng deputatlar kun tartibiga kiritilgan masalalarni muhokama qilishga kirishdi.