Konsert-tomosha faoliyatini soliqqa tortish tartibga solinadi

Fraksiya yig‘ilishida “O‘zbekiston Respublikasining ayrim qonun hujjatlariga konsert-tomosha faoliyatini amalga oshiruvchi shaxslardan davlat bojini undirish hamda ularni soliqqa tortish tizimini takomillashtirishga qaratilgan o‘zgartishlar va qo‘shimcha kiritish to‘g‘risida”gi Qonuni loyihasi muhokama qilindi.

Qayd etilganidek, Mustaqillik yillarida respublikada zamonaviy milliy estrada sanʼatini yanada rivojlantirish, estrada ijrochilarining professional mahoratini oshirish hamda iqtidorli yosh xonandalarni kashf etish uchun barcha zarur shart-sharoitlar va imkoniyatlar yaratildi. Estrada ijrochilarini har tomonlama qo‘llab-quvvatlash va rag‘batlantirish, badiiy jihatdan yuksak musiqa asarlarini keng targ‘ib qilish taʼminlanmoqda.

Shu bilan birga, tegishli vazirliklar va idoralar tomonidan konsert-tomosha faoliyatini muvofiqlashtirish va nazorat qilish, madaniy-ommaviy tadbirlarni o‘tkazish, badiiy jihatdan yuksak musiqa asarlarini yaratish sohasidagi ishlar susaygan. Shu bois, O‘zbekiston Respublikasi Prezidentining 2022-yil 13-iyuldagi PF–168-son “Konsert-tomosha faoliyatini amalga oshiruvchi shaxslardan davlat bojini undirish hamda ularni soliqqa tortish tizimini takomillashtirish to‘g‘risida”gi Farmonida belgilangan vazifalar ijrosini taʼminlash maqsadida O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish zaruriyati yuzaga kelmoqda.

Shunga ko‘ra, ushbu qonun loyihasi ishlab chiqildi va uning bilan konsert-tomosha faoliyatini amalga oshiruvchi shaxslardan davlat bojini undirish hamda ularni soliqqa tortish tizimini takomillashtirishni tartibga soluvchi O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritilmoqda.

Mazkur Qonun loyihasining maqsadi konsert-tomosha sanʼatining boy anʼanalarini yuksaltirish, asrab-avaylash va rivojlantirish, zamon talablari darajasidagi sahna asarlarini sahnalashtirish, ularda milliy anʼanalarimizni ulug‘lash orqali umuminsoniy qadriyatlarni shakllantirish, xalqimiz, ayniqsa, yosh avlod ongida milliy va jahon madaniyati va qadriyatlariga nisbatan hurmat tuyg‘usini oshirish, shuningdek, konsert-tomosha faoliyatini takomillashtirish va mazkur faoliyatni amalga oshiruvchi shaxslardan olinayotgan soliqlar hamda boshqa yig‘imlarni kamaytirish orqali yengilliklar yaratishdan iboratdir.