Yangiliklar


79

Elektron sigaretalar qatʼiy taqiqlanishi kerak

“Milliy tiklanish” fraksiyasi yig‘ilishida “Alkogol va tamaki mahsulotlarining tarqatilishi hamda isteʼmol qilinishini cheklash to‘g‘risida”gi qonuni loyihasini ikkinchi o‘qishda ham qizg‘in muhokama qildilar.

Deputatlar keyingi paytlarda yoshlarning elektron sigaretalar, nikotinli snyuslarga ruju qo‘yish holatlari ko‘payayotganiga eʼtibor qaratdi. “Milliy tiklanish” demokratik partiyasi Saylovoldi dasturidan kelib chiqqan holda bu borada jamoatchilik nazoratini kuchaytirish maqsadida tizimli o‘rganishlarni amalga oshirib keladi. 

Jumladan, 2019-yilda maktablarda o‘tkazgan reydlar davomida 110 nafar o‘quvchida nikotinli snyuslar topilgan bo‘lsa, bu ko‘rsatkich 2020-yilda 270 ta, joriy yilning ikki oyida esa 301 tani tashkil qildi. Isteʼmol qiluvchilarning eng yoshi 5-sinf o‘quvchilari ekani yanada xavotirlidir.

Jahon sog‘liqni saqlash tashkiloti elektron sigaretalarni taqiqlashni taklif etmoqda. Chunki uning insoniyat genofondiga ham taʼsir ko‘rsatishi aniqlangan. Shu bois, hozircha dunyoning 32 mamlakatida elektron sigaretalarni sotish, isteʼmol qilish cheklangan.

Fraksiya aʼzolari shundan kelib chiqib, qonun loyihasida elektron sigaretalarni taqiqlash bo‘yicha qatʼiy cheklov kiritishni taklif qildilar.