O'zimdan o'zimgacha

O‘zbekiston kompozitorlari va bastakorlari uyushmasida O‘zbekiston Respublikasi Oliy Majlisi Qonunchilik palatasi deputati, atoqli shoira, “Do‘stlik” ordeni hamda “Shuhrat” medali sohibasi Farida Afro‘z ijodiga bag‘ishlangan uchrashuv bo‘lib o‘tdi.  

Ma'lumki, Farida Afro‘z sheʼriyatida mehr, samimiyat, Vatanga sadoqat, poklik va muhabbat ustuvorlik sifatida qaraladi.

Farida Afro‘zning bugungi kunga qadar “Qirqkokilligim”, "Iztirob ko‘ylagi", "Tunlar isyoni", "Ko‘zim manim…", "Qurbonjon dodxoh" tarixiy dramasi, "O‘zimdan o‘zimgacha", "Gun aydin" (Istanbul), “Ushshoq”, “Tasbih”, “O‘sha kun – bugundir” singari bir qator  sheʼriy to‘plamlari chop etilgan va sheʼriyat ixlosmandlariga taqdim etilgan.

Sheʼrlari rus, turk, ingliz, nemis, fransuz, fors, uyg‘ur, ozor, xitoy, koreys tillariga tarjima qilingan. Uchrashuvda shoiraning sheʼrlaridan namunalar o‘qildi. Taniqli kompozitorlar Rustam Abdullayev, Oydin Abdullayeva, Behzodbek Tursunboyev musiqiy asarlari ijro etildi.

Uchrashuvda ishtirok etgan partiya vakillari va ixlosmandlar Farida Afro‘zning ijodiga yuqori baho berib, kelgusidagi ishlariga ham muvaffaqiyat tiladilar. Tadbir musiqa va sheʼriyat kechasi sifatida yuqori saviyada bo‘lib o‘tdi.