Yangiliklar


84

Telekanallardagi “kurmak”lar qachon terib tashlanadi?

“Milliy tiklanish” demokratik partiyasining 2020-2024-yillarga mo‘ljallangan Saylovoldi dasturida milliy tarbiyani ajdodlarimiz maʼnaviy merosi hamda umuminsoniy qadriyatlar negizida yuksaltirish va targ‘ib etish, jamiyatni o‘zga madaniyatlar hisobiga emas, urf-odat, anʼana va qadriyatlarimizga asoslanib rivojlantirish ustuvor vazifa sifatida belgilangan.

Ayni kunlarda mamlakatimiz jamoatchiligi tomonidan qizg‘in muhokama qilinib, yangidan yangi takliflar bilan boyitilayotgan Yangi O‘zbekistonning 2022-2026-yillarga mo‘ljallangan Taraqqiyot strategiyasi ham shu maqsadlarga xizmat qiladi. Mazkur hujjat yettita ustuvor yo‘nalishdan iborat bo‘lib, beshinchi yo‘nalishida maʼnaviy taraqqiyotni taʼminlash, ushbu sohani tubdan isloh etish va yangi bosqichga olib chiqish nazarda tutiladi.

Darhaqiqat, yurt ravnaqini maʼnaviy taraqqiyotsiz tasavvur etib bo‘lmaydi. Keyingi yillarda maʼnaviy jabhada olib borilayotgan izchil islohotlar tufayli yosh avlodni milliy qadriyatlarimizga hurmat ruhida tarbiyalash, boy merosimizni o‘rganish, adabiyot va sanʼatimizni rivojlantirish borasida ko‘plab ishlar amalga oshirildi. Birgina misol, poytaxtimiz va viloyatlar markazida shoir va adiblarimiz nomi bilan atalgan Ijod maktablarini ochishdan maqsad yoshlarimiz qalbida yaxshilik va ezgulik tuyg‘ularini kuchaytirishdir. Bu yoshlarni kelajakda Vatan istiqboli yo‘lida yonib yashashga undaydi.

Shu o‘rinda navqiron avlod tarbiyasida televideniyening ham o‘rni katta ekanligini unutmasligimiz zarur. So‘nggi paytlarda telekanallarimizning soni oshib, sohada raqobat kuchaydi. Tomoshabinni ekranga “mixlab qo‘yadigan” turli ko‘ngilochar ko‘rsatuvlar, shoularga keng o‘rin berilmoqda.

Biroq “guruch kurmaksiz bo‘lmaydi” deganlaridek, ayrim ko‘rsatuvlar, teleseriallarni ochig‘ini aytganda, oila davrasida ko‘rishga ham odam xijolat bo‘ladi. Ularda aniq bir g‘oya-mazmun va badiiylik yo‘qligi sababli tomoshabinning qimmatli vaqti behuda o‘g‘irlanadi, xolos. Undan ko‘ra tomoshabinga maʼnaviy ozuqa beradigan, estetik zavq ulashadigan, fikr va mushohadaga undaydigan, bilim va hunar egallashga qiziqtiradigan ko‘rsatuvlar tayyorlanishi maqsadga muvofiq emasmi?

Albatta, bu bilan barcha telekanallar ko‘rsatuvlari talabga javob bermaydi demoqchi emasmiz. Faqat pul va reklama ortidan quvib, yoshlar, millat maʼnaviyatini o‘ylamaydigan ayrim soha vakillarini ogohlikka daʼvat etmoqchimiz, xolos. Yoshlar bizning, Vatanimizning kelajagi ekan, demak, ularning taʼlim-tarbiyasiga, maʼnaviyatiga barchamiz birdek masʼulmiz

 

Ilhom RAJABOV,

partiyaning Navoiy viloyati Kengashi raisi,

xalq deputatlari viloyat Kengashi deputati