Yangiliklar


52

Tashabbus va takliflar to‘g‘ri yo‘lni topishga xizmat qiladi

Odamlarni ijtimoiy tarmoqlarda taklifni asl maʼnosini tushunmasdan shoshqaloq xulosa qilib tanqid yoki haqorat qilishi juda yomon illat. Bu jamoatchilikning siyosiy saviyasini ko‘rsatadi. Men tashabbusni yaxshilab o‘rganib chiqdim.

Qozilik qilmoqchi emasman ammo taklif o‘rinli, deb hisoblayman. Tarbiya va taʼlim vazirligi dunyoning bir qator davlatlarida xususan, Misr va Iordaniyada ham faoliyat olib boradi. Ushbu vazirlikning tashkil etilishi davlat idorasi yana bittaga ko‘payishini anglatmaydi.

Aksincha, mamlakatimizda faoliyat yuritayotgan maktabgacha taʼlim, maktab taʼlimi va oila masalalariga masʼul bo‘lgan vazirlik, agentlik, markaz va inspeksiyalarni birlashtiradi. Ixchamlashtirilgan davlat boshqaruvi orqali yuqori sifat va natijadorlikka erishiladi.

Jumladan, bugungi kunda yoshlar taʼlimi va tarbiyasi, ota-onalar bilan shug‘ullanuvchi quyidagi davlat idoralari mavjud:

1. Xalq taʼlimi vazirligi.

2. Maktabgacha taʼlim vazirligi.

3. Oliy va o‘rta-maxsus taʼlim vazirligi.

4. Mahalla va oilani qo‘llab-quvvatlash vazirligi.

5. Bandlik va mehnat munosabatlari vazirligi.

6. Taʼlim sifatini nazorat qilish inspeksiyasi.

7. Taʼlim markazlari.

A.Qodirov taklif etayotgan Tarbiya va taʼlim vazirligi yuqoridagi davlat organlarining ayrimlarini to‘laligicha, boshqalarining maʼlum bir funksiyalarini birlashtiradi.

Bu vazirlik har bir bolani oiladan boshlab maktabni bitirgunga qadar bo‘lgan davrda tarbiya va taʼlim sifati uchun masʼul bo‘ladi. Nafaqat davlat taʼlim muassasalari balki xususiy va nodavlat taʼlim tashkilotlarining taʼlim va tarbiya standartlarini belgilaydi. Vazirlik sifatli taʼlim berish bilan birga, ota-onalar bilan yaqindan ishlaydi, ularning malakasini oshirib boradi.

Bir so‘z bilan aytganda, markaziy idoralarni transformatsiya qilishga erishamiz. Fuqarolarga xizmat qiladigan ixcham va samarali boshqaruv tizimini yaratgan bo‘lamiz. Shu asosda bir xil yo‘nalishdagi vazifalarni amalga oshirayotgan idoralar optimallashtiriladi.

Tan olish kerak. Avvallari biron tashabbus ko‘rsatilsa, tepadan kaltak yeyilardi. Hozir ochiqlik va oshkoralik davri. Ijtimoiy tarmoqlardagi munosabatlar xuddi gapirganni og‘ziga kalish bilan urishdek gap. Bu riivojlanish uchun eng katta to‘siq. To‘g‘rimi, noto‘g‘rimi tashabbus va takliflar to‘g‘ri yo‘lni topishga xizmat qilmoqda. Fikrlarni bo‘g‘masligimiz kerak!

Doniyor Toshboyev,

“Milliy tiklanish” demokratik partiyasi

Markaziy kengashi bo‘lim boshlig‘i