Yangiliklar


209

Barqaror iqtisodiyot kafolati

Kuchli ijtimoiy siyosat yuritish va uni muntazam rivojlantirishning muhim asosi, bu milliy iqtisodiyotning barqarorligi taʼminlash sanaladi. Barqaror iqtisodiyotgina ijtimoiy muammolarni hal etish imkonini beradi.

Shu sababli, Taraqqiyot strategiyasida xalq farovonligini oshirish, yangi ish o‘rinlari va daromad manbalarini yaratish, kambag‘allikni qisqartirish uchun milliy iqtisodiyotni jadal rivojlantirish va yuqori o‘sish surʼatlarini taʼminlash yo‘nalishida muhim maqsadlar belgilangan.

Prezident Shavkat Mirziyoyev raisligida Yangi O‘zbekistonning 2022-2026 yillarga mo‘ljallangan taraqqiyot strategiyasini amalga oshirish muhokamasiga bag‘ishlangan videoselektor yig‘ilishida, iqtisodiyot barqarorligini taʼminlash maqsadlariga erishish bo‘yicha belgilangan vazifalarga alohida eʼtibor qaratildi.

Umuman olganda, keyingi yillarda mamlakatda iqtisodiyot barqarorligini taʼminlash va yalpi ichki mahsulotda sanoat ulushini oshirishga qaratilgan sanoat siyosatini davom ettirgan holda, sanoat mahsulotlarini ishlab chiqarish hajmini 1,4 barobar oshirish rejalashtirilgan. Bunga esa, sanoatning yetakchi tarmoqlari va iqtisodiyotni yanada liberallashtirish hamda transformatsiya jarayonlarini yakunlash, energetika sohasida sog‘lom raqobat muhitini shakllantirish, “Xomashyodan tayyor mahsulotgacha” bo‘lgan ko‘p pog‘onali qo‘shilgan qiymat zanjirlarini yaratish, metallurgiya sohasida yirik investitsiya loyihalarini amalga oshirish, kimyo va gaz-kimyosi, to‘qimachilik, charm-poyabzal, avtomobil va boshqa sanoat sohalarini yana-da rivojlantirish orqali erishiladi. Masalan, to‘qimachilik sanoati mahsulotlari ishlab chiqarish hajmini 2 barobarga ko‘paytirish, eksport hajmini 5 milliard AQSH dollariga yetkazish natijasida 570 ming nafar yangi ish o‘rinlari yaratiladi.

Elektrotexnika sanoatida yuqori qiymatli mahsulotlar ishlab chiqarish hajmini 2 baravarga va eksportini 3 baravarga oshirish orqali 2022-2026-yillarda 700 million AQSH dollarlik 168 ta investitsiya loyihalarni amalga oshiriladi.

Bundan tashqari, energiya resurslari va tabiiy gaz bozorlarini ijtimoiy himoya kafolatlari belgilangan holda erkinlashtirib, sohaga xususiy investitsiyalarni keng jalb qilish hamda ehtiyojmand aholini himoya qilish uchun ijtimoiy isteʼmol normalari kiritiladi.

Albatta, strategiya doirasida milliy iqtisodiyotimizni jadal rivojlantirish orqali keyingi besh yillikda yurtimizda makroiqtisodiy barqarorlikni taʼminlash va yillik inflyatsiya darajasini bosqichma-bosqich 5 foizgacha pasaytirish, davlatning iqtisodiyotdagi ishtirokini kamaytirish, shu bilan birga raqobatbardosh erkin tadbirkorlik muhitini yaxshilash va mamlakatning investitsion salohiyati hamda jozibadorligini yana-da oshirish xizmat qiladi.

Asosiysi, Taraqqiyot strategiyasida o‘z aksini topayotgan, adolatli va xalqparvar davlat barpo etishda muhim ahamiyat kasb etadigan maqsadlarni amalga oshirish uchun barchamizdan masʼuliyat, mustahkam ishonch, chinakam fidoiylik talab etiladi. Shu bilan birga, hukumatni bu borada har tomonlama qo‘llab-quvvatlash, ularga yaqindan ko‘makchi bo‘lish orqali ishonamizki ko‘zlagan ezgu niyatlarimizga albatta yetamiz!

 

Farhod ZAYNIYEV,

Oliy Majlisi Qonunchilik palatasining deputati,

Sanoat, qurilish va savdo masalalari qo‘mita raisi o‘rinbosari