Maʼlumki, mamlakatimiz yoshlari aholimizning 60 foizini tashkil qiladi. Shu bois, yurtimizda ushbu masala har doim davlatimiz siyosati darajasidagi masala bo‘lib kelgan. Buning isbotini so‘nggi yetti yilda yoshlarga oid 100 dan ziyod qonun va qarorlar qabul qilingani, ularga 200 dan ortiq imtiyozlar berilganidan ham bilish mumkin. Umuman olganda, Yangi O‘zbekistonda so‘nggi yetti yil yoshlarni qo‘llab-quvvatlash, ularni isteʼdod va salohiyatini ro‘yobga chiqarishda “katta sakrash davri” bo‘ldi.

“Milliy tiklanish” demokratik partiyasi uchun yoshlarning birlashishi, milliy va umuminsoniy qadriyatlarga sodiqlik, vatanparvarlik ruhida tarbiya topishlari, ular qalbida shu yurt farzandi ekanligidan hamda xalqimizning tarixi, boy madaniy merosidan faxrlanish tuyg‘usi shakllanishi, kelajagimiz egalariga yuksak ishonch bildirib, ularni yangi marralar sari ilhomlantirish ustuvor masala hisoblanadi.

Partiyamizning ushbu yo‘nalishdagi maqsad va vazifalari “Xizmat-beminnat”, “Uyma-uy”, “Ustoz va shogird” kabi muhim loyihalar doirasida ijrosi taʼminlanib, yuzlab yoshlarga qo‘shimcha bepul taʼlim berilmoqda, hunar o‘rgatilib, tadbirkorligini yo‘lga qo‘yishda yaqindan ko‘maklashilmoqda, eng asosiysi, bandligi taʼminlanmoqda.

Birgina “Xizmat-beminnat” loyihasi doirasida so‘nggi yillarda respublika bo‘yicha 5523 ta o‘quv kurslari tashkil qilinib, umumtaʼlim fanlaridan 15 477 nafar kam taʼminlangan oilalar farzandlariga qo‘shimcha bepul taʼlim berildi. “Uyma-uy” loyihasi doirasida esa 13 721 nafar yoshlar bandligi taʼminlandi.

Partiyamizda yoshlarning shaxsiy va kasbiy salohiyatlarini rivojlantirishlari,  yetakchilik qobiliyatini yuzaga chiqarishlari, o‘zlariga bo‘lgan ishonchni yana-da mustahkamlashlari hamda zamonaviy dunyoning murakkab talablariga javob bera oladigan shaxs bo‘lib shakllanishlari uchun barcha sharoitlar yaratilganini alohida eʼtirof etish lozim. “Milliy tiklanish” yoshlar uchun strategik fikrlash va samarali muomala qilish ko‘nikmalarini rivojlantiradigan tajriba maydoni – “maktab” vazifasini o‘tamoqda, deyishga barcha asoslar yetarli. Yaʼni, partiyamiz yoshlarning davlat va jamiyat boshqaruvida siyosiy xodim sifatida quyidan yuqori pog‘onalar sari o‘sib borishida boshlang‘ich qadamlarni tashlashida muhim ahamiyat kasb etayotir.

“Milliy tiklanish” demokratik partiyasi yoshlarni siyosiy faollikka jalb etibgina qolmay, turli taʼlimiy va kasbiy dasturlar orqali ularni qo‘llab-quvvatlab ham kelmoqda. Nazariy taʼlim hamda amaliy faoliyat uyg‘unligi esa yoshlarga real muammolarni hal etishda, innovatsion yondashuvlarni ishlab chiqishda yaqindan yordam beradi. Partiyaning 2025-2029 yillarga mo‘ljallangan Saylovoldi dasturida ham yoshlar masalasidagi bir qator muhim taklif va tashabbuslar ilgari surilgani eʼtiborga molik.

Xulosa qilib aytganda, partiyamiz o‘z saflaridagi yoshlarga ishonadi, tayanadi, ularni  haqiqiy yetakchi, liderlar sifatida shakllanishi uchun bor imkoniyatini ishga soladi.

Nodirbek MURODOV,

Oliy Majlisi Qonunchilik palatasi huzuridagi Yoshlar parlamenti raisi o‘rinbosari