Maʼlumki, mamlakatimizda qabul qilinayotgan har qanday qonun va qonunosti hujjatlari insonparvarlik g‘oyasi singdirilgan Bosh Qonunimiz – Konstitutsiyamiz asosida qabul qilinadi.

O‘zbekiston Prezidenti Shavkat Mirziyoyev taʼkidlaganlaridek: “Konstitutsiya har bir fuqaroning ongi va qalbidan chuqur joy olgan, ularning huquq va erkinliklarini to‘liq kafolatlaydigan haqiqiy hayot qomusiga aylanmog‘i lozim”.

Konstitutsiyamizni ishlab chiqishda xalqimizning ming yillik qadriyatlari ham asos bo‘lganini alohida eʼtirof etish lozim. Unda adolatparvarlik, mehr-oqibat kabi yuksak fazilatlar singdirilgani g‘oyat muhim.

Jumladan, Konstitutsiyaning 13-moddasida "O‘zbekiston Respublikasida demokratiya umuminsoniy prinsiplarga asoslanadi, ularga ko‘ra inson, uning hayoti, erkinligi, shaʼni, qadr-qimmati va boshqa ajralmaz huquqlari oliy qadriyat hisoblanadi.

Demokratik huquq va erkinliklar Konstitutsiya va qonunlar bilan himoya qilinadi", deb mustahkamlab qo‘yilgan.

Shu maʼnoda, har bir fuqaroning qonuniy manfaatlarini himoya qilish bosh Qomusimizning eng oliy maqsadidir. Shundan kelib chiqib, Konstitutsiyada davlatning asosiy belgilari belgilangan bo‘lib, unda bugunimiz va kelajagimiz aks ettirilgan hamda xalqimizning asrlar davomida saqlanib qolgan urf-odat va anʼanalari, boy tarixi mujassamlashgan. Shuningdek, xalqimizga xos bo‘lgan – adolatparvarlik, mehr-oqibat, mardlik va adolat kabi olijanob fazilatlar ushbu hujjatdan munosib o‘rin olgan.

Shuni alohida taʼkidlash joizki, xalqaro hamjamiyat tomonidan mamlakatimiz Konstitutsiyasi dunyodagi eng demokratik konstitutsiyalardan biri sifatida eʼtirof etilmoqda va umuminsoniy g‘oyalar – tenglik, erkinlik, millatlararo totuvlik kabi eng eng ulug‘ g‘oyalarga xizmat qilmoqda.

Ruslan JUMAMURATOV,

Oliy Majlis Qonunchilik palatasi deputati