Yangiliklar


262   14-03-2022

Tarixiy devorning qulashiga faqat yomg‘ir sabab bo‘lganmi?

Ijtimoiy tarmoqlarda 11-mart kuni kechasi Buxoro shahridagi XVI asrga tegishli “Talipoch qalʼa darvozasi” devorining bir qismi qulab tushgani haqida xabarlar tarqaldi. 

"Milliy tiklanish" demokratik partiyasi Buxoro viloyati Kengashi vakillari, deputatlar hamda tegishli idora vakillaridan iborat  guruh ertasi kuni voqea joyida bo‘lib, holatni o‘rgandi. Aniqlanishicha, bunga Buxoroda bir necha kun davom etgan kuchli yog‘ingarchilik sabab bo‘lgan.

– “Talipoch qalʼa darvozasi”ning bir qism 2003-yilda restavratsiya qilingan edi, - deydi viloyat madaniy meros boshqarmasi bosh mutaxassisi Shoabbos Sharofiddinov. - Aynan restavratsiya qilingan devorning bir qismi, yaʼni xom g‘isht bilan terilgan qism qulab tushgan. 

Mutaxassisning taʼkidlashicha, bunga restavratsiya ishlaridagi eʼtiborsizlik, shoshma-shosharlik, taʼmirlash ishlariga malakali ustalarning jalb qilinmagani ham sabab bo‘lgan. 

O‘tgan yillar davomida  obyekt restavratsiya qilinmagani sababli madaniy qatlamning bir tomonida cho‘kishlar va yoriqlar paydo bo‘lgan. Shu bois, tarixiy inshootni asrash ishlarini joriy yilda ham davom ettirish ko‘zda tutilgandi. Buning uchun  respublika byudjetidan 1 mlrd. so‘m miqdorida mablag‘ ajratish belgilangan edi.

– Albatta, bu kabi holatlar viloyatimizda mavjud madaniy meros obyektlarini asrab-avaylash, restavratsiya va tiklash ishlari ustidan qatʼiy nazorat o‘rnatishni talab etadi,  – deydi partiyaning Buxoro viloyati Kengashi raisi Maxsud Muhammedov. – "Milliy tiklanish" demokratik partiyasi soha mutaxassislarini jalb qilgan holda mazkur holatni yana bir bor o‘rganadi va uni tezkor qayta tiklashni nazoratga oladi.

 

Muslima Ro'ziyeva

Partiyaning Buxoro viloyati Kengashi bosh mutaxassisi