Yangiliklar


258   16-03-2022

Mahalla yorug' yuzimiz va vijdonimiz ko'zgusiga aylanishi shart!

Prezidentimiz tomonidan ilgari surilgan "Inson qadri uchun" tamoyilini to‘la ro‘yobga chiqarishga qaratilgan demokratik islohotlar aholimiz huquq va erkinliklari hamda qonuniy manfaatlarini qadriyat darajasiga ko‘tarishga xizmat qilmoqda. Bunda mahalla instituti faoliyatini tubdan takomillashtirish yo‘lidagi ishlar muhim ahamiyatga ega, albatta.

Mahallalar haqida gapirganda, avvalo, bugunga qadar mahalliy hokimlik va kengashlar hamda mahallalar 27 yil avval, yaʼni hokimlik instituti joriy etilgan dastlabki paytda qabul qilingan qonunlar asosida ishlayotganini qayd etish lozim. Shuning uchun ham "Fuqarolarning o‘zini o‘zi boshqarish organlari to‘g‘risida"gi Qonun bugungi islohotlar talabiga javob bermay qoldi. Ayni vaziyat mahallalar nufuzi, resurs va imkoniyatlarini ko‘paytirish, xodimlarning moddiy taʼminotini yaxshilash hamda vakolatlarini kengaytirish zaruratini tug‘dirmoqda. 

Shu bois, 1-mart kuni Prezidentimizning "Oila va xotin-qizlar bilan ishlash, mahalla va nuroniylarni qo‘llab-quvvatlash tizimini takomillashtirish choratadbirlari to‘g‘risida»gi farmoni hamda ushbu hujjat asosida "Mahalla va nuroniylarni qo‘llab-quvvatlash vazirligi faoliyatini tashkil etish to‘g‘risida"gi qarori qabul qilindi. 

Aynan ushbu farmon bilan mahalla va nuroniylarni qo‘llab-quvvatlash vazirligi va uning hududiy bo‘limlari tashkil etilib, vazirlikning asosiy vazifa va faoliyat yo‘nalishlari belgilandi. Shu bilan birga, nuroniy va keksalarni qo‘llab-quvvatlash bo‘yicha davlat siyosatining asosiy yo‘nalishlari, xususan, keksa avlod vakillarining turmushini yaxshilab, uzoq umr darajasini oshirish, ijtimoiy yordam ko‘rsatish, moddiy taʼminotini tashkil etish, ularning huquqiy va moliyaviy savodxonligini oshirish, eng asosiysi, tizimli ravishda jismoniy tarbiya va sport bilan shug‘ullanishlari uchun zarur sharoitlarni yaratish bo‘yicha vazifalar belgilab berildi. 

Qaror bilan vazirlik tashkiliy tuzilmasi, shtat birliklari, ularning vazifa va funksiyalari, moliyalashtirish manbalari va tegishli nizom ishlab chiqilishi belgilandi. Endilik da mahalala raisining oylik ish haqi miqdori 2022-yil 1-maydan boshlab unga biriktirilgan xonadonlar soniga mutanosib ravishda belgilanadi hamda ularning samaradorlik ko‘rsatkichlaridan kelib chiqib 15 foiz miqdorda moddiy rag‘batlantirish to‘lanadigan bo‘ldi. Bu, o‘z navbatida, mahalla raisligiga munosib kadrlar tanlashga xizmat qiladi. 

Yana bir muhim jihati, hujjatlarda mahalla raisining nufuzini oshirish maqsadida ularga qo‘shimcha huquqlar berilmoqda. Eng asosiysi, vazirlik va manfaatdor idoralar bilan birgalikda joriy yil 1-iyulga qadar "Mahalla to‘g‘risida"gi qonun loyihasini ishlab chiqish belgilandi. Ushbu qonun loyihasida hokim yordamchisi, mahalla dagi yoshlar yetak chisi va xotin-qizlar faolini mahalla kengashi tarkibiga kiritish ko‘zda tutiladi. Shuningdek, hokim yordamchisi, mahalladagi yoshlar yetakchisi va xotin-qizlar faoli, ichki ishlar organlari tayanch punkti profilaktika inspektorining mahalla hududida amalga oshirilishi lozim bo‘lgan vazifalari hamda mahallani kompleks rivojlantirish bo‘yicha kollegial masʼuliyati va javobgarligi belgilanadi. Mahalla raislarini ijtimoiy himoya qilish tizimini kuchaytirish masalalari ham eʼtiborga olinadi. 

Shu bilan birga, O‘zbekiston Prezidentining shu yil 28-yanvardagi "2022-2026-yillarga mo‘ljallangan Yangi O‘zbekistonning taraqqiyot strategiyasi to‘g‘risida"gi Farmonining 3-bandi bilan mahallaning “faol” modelini joriy etish, uni aholi muammolarini bevosita hal qilish hamda hududni rivojlantirish uchun zarur resurs va imkoniyatlar bilan taʼminlashni nazarda tutuvchi qoidalar belgilandi.

Albatta, ushbu hujjatlar ijrosi va ishlab chiqiladigan qonun loyihasi mahalla instituti faoliyatini tubdan yaxshilash, jamoat boshqaruvida mahalla faoliyatining ahamiyati, samaradorligi va natijadorligini oshirishga xizmat qilishi, shubhasiz. Zero, Davlatimiz rahbari taʼkidlaganlaridek: "Islohotlarimiz natijalari, bo‘layotgan o‘zgarishlar va aholining kayfiyati, avvalo, mahallada seziladi. Shu maʼnoda, "Mahalla – yorug‘ yuzimiz va vijdonimiz ko‘zgusi", desak, to‘g‘ri bo‘ladi".