Yangiliklar


382   17-03-2022

Partiya qanotlari Navro‘zni nazoratsiz qolgan voyaga yetmaganlar tarbiyalanayotgan taʼlim muassasasidan boshladi

Ilk bayram tadbiri Sirdaryo viloyatining Baxt shahrida joylashgan O‘zbekiston Respublikasi Milliy gvardiyasi huzuridagi Ixtisoslashtirilgan o‘quv-tarbiya muassasasida tashkil etildi.

Tadbir doirasida Oliy Majlis Qonunchilik palatasi deputatlari F.Bo‘tayeva, Sh.Qulmatov, K.Tojiyevlar ishtirokida “Deputat bilan yuzma-yuz” loyihasi amalga oshrildi.

Yoshlar parlamenti aʼzolari A.Ochilboyev, N.Murodov tomonidan tashkillashtirilgan “Zakovat” intellektual o‘yini, “O‘zingga ishon!” mavzusidagi motivatsion ochiq muloqot hamda “Milliy tiklanish kubogi” uchun sport musobaqalari tarbiyalanuvchilarda katta qiziqish uyg‘otdi.

Nizomiy nomidagi Toshkent davlat pedagogika universiteti psixologi D.Mahmudova tomonidan psixologik trening o‘tkazildi. Shuningdek, Yoshlar ishlari agentligi tashabbusi bilan suratga olingan “O‘zbekistonlik”  nomli hujjatli film namoyishi hamda xalq deputatlari Sirdaryo viloyati, tuman Kengashlari deputatlari ishtirokida uning  muhokamasi bo‘lib o‘tdi.

Tadbirda viloyat partiya Kengashi raisi, sambo va dzyudo kurash turlari bo‘yicha sport ustasi Norbobo Soatov so‘zga chiqib, o‘zining hayotiy maslahatlarini yoshlar bilan o‘rtoqlashdi.

Muassasada partiya Markaziy kengashi tomonidan “Milliy tiklanish”  kutubxonasi” tashkil etildi. 300 nomdagi bolalar kitoblari taqdim etildi hamda kutubxonani boyitish masalasi “Deputat ayollar klubi” aʼzolari nazoratiga olindi.

Maʼrifiy kechada tarbiyalanuvchilarning sheʼriy mashqlari taniqli shoira Farida Afro‘z tomonidan baholab borildi. Bolalarning hayotiy xulosalaridan jamlangan to‘plam nashr etish tashabbusi ilgari surildi. Yoshlarning sevimli xonandalari ijrosidagi qo‘shiqlarga bolalar jo‘rovoz bo‘lishdi.

Tarbiyalanuvchilar uchun tibbiy ko‘rik ham tashkil etildi. Tadbir yakunida partiya tomonidan bayram dasturxoni yozildi.        

Xabaringiz bor, partiya o‘tgan yillar mobaynida alohida sharoitlarda tarbiyalanish va taʼlim olishga muhtoj  14 yoshdan 18 yoshgacha bo‘lgan, nazoratsiz qolgan, chin yetim  va chala yetim bo‘lgan voyaga yetmaganlar tarbiyalanadigan muassasalar faoliyatini tubdan takomillashtirish borasida o‘rganishlarni amalga oshirib, bu boradagi taklif va mulohazalarini tegishli idoralarga taqdim etgan edi.

Ushbu nazorat-tahlil o‘rganishlari samarasi o‘laroq, O‘zbekiston Respublikasi Prezidentining 2019-yil 29-maydagi “Ixtisoslashtirilgan o‘quv-tarbiya muassasalari faoliyatini tubdan takomillashtirish to‘g‘risida”gi Qarori qabul qilingan edi.

Kuni kecha mazkur qaror ijrosi yuzasidan amalga oshirilgan ishlar, jumladan, muassasaning bugungi holati, unda taʼlim-tarbiya olayotgan o‘quvchilar uchun yaratilayotgan shart-sharoitlar bilan tanishish maqsadida partiya rahbariyati, partiyaning Oliy Majlis Qonunchilik palatasidagi fraksiyasi hamda Yoshlar parlamenti aʼzolari, mahalliy Kengash deputatlari, Nizomiy nomidagi Toshkent davlat pedagogika universitetidan jalb etilgan ekspertlardan iborat Ishchi guruhi tomonidan o‘rganish olib borildi. Shuni alohida eʼtirof etish joizki, o‘tgan davr mobaynida muassasada bir qator ijobiy ishlar amalga oshirilgan. Biroq taʼlim-tarbiya jarayonini tashkil etish bilan bog‘liq ayrim kamchiliklar ham kuzatildi. Tez kunda o‘rganish natijalariga bag‘ishlangan davra suhbati tashkil etish rejalashtirilmoqda.

Ayni kunlarda partiya  “Ayollar qanoti”, “Deputat ayollar klubi” tomonidan respublika miqyosida ayollarni reablitatsiya qilish va moslashtirish markazlarida bayram kechalari bilan birgalikda  nazorat-tahlil  tadbirlari davom etmoqda.

 

F.Jalilova, B.To‘rayev, M. Ergasheva partiya Markaziy kengashi masʼullari