Yangiliklar


236   13-04-2022

Prezident ishtirokida dolzarb masalalar muhokama qilindi

Prezidentimiz 11-aprel kuni transport va kommunal sohalardagi loyihalar taqdimoti bilan tanishdi.

Maʼlumki, havo transporti tizimi har qanday davlat uchun muhim strategik ahamiyat kasb etadi va ushbu soha doimiy rivojlantirilib borilishi lozim. Bugungi kunda yo‘lovchi va yuk tashishning eng tezkor yo‘li havo transporti bo‘lganligi sababli o‘z dolzarbligini saqlab qolish bilan birga xizmatlar narxining yuqoriligini ham saqlab qolmoqda. Jahon havo transport tizimi bilan milliy havo tizimi o‘rtasida raqobatda ustunlikka erishishning shartlari arzon narxlar va yuqori sifatli xizmat ko‘rsatishdir. Bundan tashqari barqaror iqtisodiy o‘sishni taʼminlash uchun xalqaro tajribalarni o‘zlashtirish, kadrlar sifatini yaxshilash muhim ahamiyatga ega.

O‘zbekiston Prezidentining 2021-yil 30-apreldagi qaroriga muvofiq, joriy yil 1- sentyabrga qadar “Uzbekistan airways” AJ ustav kapitalidagi 51 foiz va undan yuqori miqdordagi davlat ulushi aksiyalarini ommaviy joylashtirish (IPO) orqali savdoga chiqariladi. Bu esa tizimga davlat aralashuvini qisqartirish, sohada ijobiy o‘zgarishni va xizmat sifatining oshishini taʼminlashga qaratilgan ishlarni jonlantirish imkoniyatini beradi.

2021-yil yakunlari bo‘yicha yurtimiz aeroportlari orqali 5 million 400 ming yo‘lovchi va 82 ming tonna yuk tashilgan, xorijiy aviakompaniyalarga xizmat ko‘rsatish hajmi oshgan. Xarajatlarni maqbullashtirish bo‘yicha ko‘rilgan choralar natijasida barcha aeroportlarning moliyaviy ko‘rsatkichlari yaxshilangan.

Tizimda olib borilayotgan islohotlar natijasida Samarqand xalqaro aeroporti yangidan qurilib, ishga tushirilganligi xalqaro tashuvlar soni va sifatini oshirib, tranzit tashuvlarni ushbu yo‘nalishlar orqali o‘tkazish uchun sharoit yaratadi. Bundan tashqari respublikamizda sifatli darajadagi avia kerosin ishlab chiqarilishi va aeroportlarimizni xalqaro xab darajasiga olib chiqishda muhim rol o‘ynaydi.

Havo transporti tizimida islohotlarni izchil davom ettirish maqsadida mamlakatimiz aeroportlarini 2035-yilga qadar rivojlantirish strategiyasi ishlab chiqilgan bo‘lib, taqdimotda ushbu strategiyani 2026-yilgacha amalga oshirish dasturi muhokama qilindi. Bunda aeroportlarni ixtisoslashtirish, jumladan, Toshkent aeroportini xalqaro hab, Navoiy aeroportini yuk tashish habi, Samarqand va Buxoro aeroportlarini turizm hablariga aylantirish ko‘zda tutilgani qayd etildi.

Davlatimiz rahbariga Toshkent xalqaro aeroportini modernizatsiya qilish orqali yo‘lovchilarni o‘tkazish quvvatini soatiga 2 ming 400 nafarga oshirish, ro‘yxatdan o‘tish, pasport nazorati va samolyotga chiqish yo‘laklarini ko‘paytirish rejalari tanishtirildi.

Maʼlumki, Farg‘ona vodiysidagi uchta – Andijon, Namangan va Farg‘ona aeroportlari shaharlar ichida joylashgani va atrofi bino-inshootlar bilan zich o‘ralgani sababli ularni kengaytirish imkoniyati cheklangan. Shu bois, uchta viloyatning o‘rtasida yangi xalqaro aeroport qurish taklif etilmoqda.

Taqdimotda, shuningdek, “Toshkent-Sharqiy” aeroportining bosh rejasi ham muhokama qilindi. Buxoro va Urganch aeroportlarida yangi yo‘lovchi terminallari qurish, hududlararo loukoster aviakompaniyasi faoliyatini yo‘lga qo‘yish loyihalari haqida maʼlumot berildi.

Prezidentimiz aeroportlarda xizmatlarni ko‘paytirish va sifatini yaxshilash, narxlarning ommabopligini taʼminlash, aeroport xodimlarining dunyoqarashi va malakasini oshirish, yo‘lovchilarga xizmat ko‘rsatish vaqtini qisqartirish zarurligini bo‘yicha ham ko‘rsatmalar berdi.

Taqdimot jarayonining ikkinchi qismida issiqlik taʼminoti tizimini yangilash va qamrovini oshirishga oid rejalar ham ko‘rib chiqildi. Oxirgi to‘rt yilda hududlarda 47 ta qozonxona qurilib, qariyb 80 kilometr tarmoq yotqizilgani qayd etildi.

2022-2026-yillarda yana 172 ta qozonxona va 482 kilometr tarmoqni yangidan qurish, 109 ta qozonxona va 543 kilometr tarmoqni modernizatsiya qilish ko‘zda tutilgan. Bularning natijasida markazlashgan issiqlik taʼminoti bilan qamrab olish darajasi hozirgi 52 foizdan 66 foizga yetadi.

Davlatimiz rahbari issiqlik hosil qilish va undan foydalanish tizimini raqamlashtirish, sohada davlat-xususiy sheriklikni kengaytirish, issiqlik taʼminoti korxonalarini moliyaviy sog‘lomlashtirish bo‘yicha ko‘rsatmalar berdi.

Albatta, Prezident ishtirokida muhokama qilingan sohalar har doim dolzarb bo‘lib kelgan. Transport odamlarning uzog‘ini yaqin qilsa, kommunal xizmatlar bilan har kuni, har daqiqada duch kelamiz. Demak, bu sohalarda yillar davomida yig‘ilib qolgan muammolarni hal qilishdan maqsad “Inson qadri uchun” tomoyili hayotiyligini taʼminlashdir.

 

Bekmirza ESHMURZAYEV,

Oliy Majlis Qonunchilik palatasi deputati