O‘zbekiston yoshlari har doim davlatning eʼtibor markazida bo‘lib kelgan. Lekin Prezidentimizning yoshlar bilan bu galgi samimiy suhbati har qachongidan boshqacha bo‘ldi. Asosiy eʼtibor yoshlarga o‘z taqdirini o‘zi hal qilish imkoniyatini berish, ularni jamiyatning faol qatlamiga aylantirishga qaratildi.

Ilgari surilgan eng muhim tashabbuslardan biri yoshlar tadbirkorligini qo‘llab-quvvatlash bo‘ldi. Ochig‘i, bu g‘oya avval ham ko‘p tilga olingan, lekin hozirgidek ishonch bilan qaralgan emas. Yoshlarni tadbirkorlikka yo‘naltirish deganda ko‘pchilik kredit berish yoki shunchaki ruxsat berish deb tushunadi. Aslida esa bu tizimli yondashuvni talab qiladigan jarayon. Yoshlar o‘z biznesini ochishi uchun nafaqat mablag‘, balki tajriba, bilim va qo‘llab-quvvatlov ham kerak. Aynan uchrashuvda Prezident mana shu masalani o‘rtaga tashladi.

Yana bir dolzarb masala: oliy taʼlim bitiruvchilarining bandligi. Bugungi kunda aksariyat yoshlar universitetni tugatgach, kasbiga mos ish topishda qiyinchiliklarga duch keladi. Bu muammo yillar davomida yig‘ilib kelgan va hozir ham dolzarbligicha qolmoqda.

Prezident aynan shu masalaga yechim sifatida davlat, bank va tadbirkorlar hamkorligida bitiruvchilarga ish o‘rinlari yaratish mexanizmini joriy etishni taklif qildi. Bu bilan davlat bitiruvchilarning taqdiriga befarq emasligini yana bir bor isbotladi. 

Shuningdek, ijodiy iqtisodiyot va IT sohasining rivoji bo‘yicha ham muhim tashabbuslar ilgari surildi. O‘zbekiston hali bu yo‘nalishda jahon miqyosida yetakchilik qilayotgan davlatlar qatoriga kira olmagan bo‘lsa-da, mamlakatda katta salohiyat borligi seziladi. Masalan, kreativ industriyalar, IT-startaplar, media va raqamli texnologiyalarni rivojlantirish orqali nafaqat ichki bozorni, balki xalqaro maydonda ham raqobatbardosh mahsulotlar yaratish mumkin. Prezident aynan shu sohalarga alohida eʼtibor berib, bu yo‘nalishda yoshlarni qo‘llab-quvvatlash zarurligini taʼkidladi. 

Yoshlar masalasida eng dolzarb mavzulardan yana biri ularning ijtimoiy faolligini oshirishdir. Maʼlumki, bugungi kunda ko‘plab yoshlar jamiyat hayotida yetarlicha faol emas, muammolarni faqat davlat hal qilishi kerak, degan tasavvur shakllangan. Prezidentning nutqida aynan shunga alohida urg‘u berildi: har bir yosh o‘z kelajagini o‘zi yaratishi kerak. Davlat faqat sharoit yaratib bera oladi, ammo tashabbus va harakat yoshlarning o‘ziga bog‘liq. Shu bois, yoshlarning siyosiy, ijtimoiy va madaniy faolligini oshirish bo‘yicha yangi mexanizmlar ishlab chiqilayotgani eʼlon qilindi. 

Bundan tashqari, taʼlim tizimini tubdan o‘zgartirish va yoshlarning zamonaviy kasblarga yo‘naltirilishi masalasi ham muhokama qilindi. Dunyo bo‘ylab anʼanaviy kasblarning ko‘pchiligi yo‘qolib, ularning o‘rnini yangilari egallayotgan bir vaqtda, O‘zbekistonda ham bu jarayonni jadallashtirish zarurati bor. Prezident yoshlarni kelajak kasblariga tayyorlash, IT, muhandislik, biotexnologiyalar, sunʼiy intellekt va robototexnika bo‘yicha taʼlim berish bo‘yicha chora-tadbirlar ko‘rilishini maʼlum qildi.

Men uchun ushbu uchrashuv shuni anglatdiki, davlat endi yoshlarni himoya qilish yoki ularga qandaydir tayyor yechimlarni taklif qilish bilan cheklanmoqchi emas. Asosiy maqsad yoshlarga yo‘l ochib berish, ularga imkoniyat yaratish. Lekin endi bu imkoniyatlardan qanday foydalanish yoshlarning o‘ziga bog‘liq. Prezident kelajak avlodni buyuk maqsadlarga ilhomlantirishni maqsad qilgan bo‘lsa, yoshlar bunga tayyor bo‘lishi kerak. Davlat qanchalik yaxshi sharoit yaratmasin, agar yoshlarning o‘zida intilish bo‘lmasa, natija bo‘lmaydi. Endi kimdandir yordam kutish emas, har bir inson o‘z harakatlari bilan muvaffaqiyat sari intilishi lozim.  

Baxtishod RASHIDOV,

“Yoshlar qanoti” faoli