Yangiliklar


255   18-04-2022

Har qanday sharoitda xalqimiz farovonligini o‘ylashimiz shart!

Prezident Shavkat Mirziyoyev raisligida 15-aprel kuni oziq-ovqat mahsulotlarini ko‘paytirish orqali bozorlarda narx-navo barqarorligini taʼminlash, tadbirkorlik uchun qo‘shimcha shart-sharoitlar yaratish masalalari bo‘yicha videoselektor yig‘ilishi o‘tkazildi.

So‘nggi paytlarda Davlatimiz rahbari ishtirokida bejizga tez-tez ushbu masalalarda yig‘ilish o‘tkazilayotgani yo‘q. Bugun ayrim hududlarda sodir bo‘layotgan notinchliklar dunyoda oziq-ovqat taqchilligi va narxlarning o‘sishiga sabab bo‘lyapti.

Misol uchun, 2021-yil I-chorakda dunyo bozorida yog‘ mahsulotlari narxi yil boshiga nisbatan 23 foizga, bug‘doy 20 foizga, shakar 10,4 foizga qimmatlashdi. Go‘sht mahsulotlari o‘sishi 4,3 foizni tashkil etdi. Umuman, dunyo bo‘yicha oziq-ovqat narxlari 2021-yilning mos davriga nisbatan 34 foizga oshdi. Mineral o‘g‘itlar va yoqilg‘i narxlari 2 baravarga ko‘tarilgan. Bu esa import mahsulotlariga yuqori darajada bog‘langan mamlakatlarda tezkor chora-tadbirlar ko‘rish zaruratini tug‘dirmoqda.

Albatta, tobora dunyoga integratsiyalashayotgan O‘zbekistonda ham shunday holatlar kuzatilayapti. Ammo hukumatning o‘z vaqtida ko‘rayotgan choralari sabab, bozorlarimizda oziq-ovqat mahsulotlari barqarorligi saqlanib turibdi. Lekin bu bizning tomoshabin bo‘lib o‘tirishimizga sabab bo‘lolmaydi. Aksincha, yana-da ko‘proq mahsulot yetishtirib, avvalo, ichki bozorimizni to‘ldirishimiz, ortganini esa eksport qilishimiz mumkin. Shu bois, bu yil 7 million 700 ming tonna bug‘doy, 23 million tonna meva-sabzavot yetishtirib, 1,5 mlrd dollar eksportni taʼminlash maqsad qilingan. 

Xo‘sh, buning uchun nima qilish kerak? Yig‘ilishda Prezidentimiz ushbu masalaga to‘xtalib, bobodehqonlarimiz bahorning har bir kunidan, har bir soatidan unumli foydalanishi lozimligini taʼkilandi.

Oziq-ovqat mahsulotlarini ko‘paytirish uchun yangi qo‘shilayotgan 300 ming gektardan ziyod yer maydonidan samarali foydalanish zarurligi qayd etildi. Hozirgi kunda 80 ming gektar paxta va g‘alla maydonlari qisqartirilib, 254 ming nafar aholiga ochiq tanlov asosida berildi. Bu oziq ovqat yetishtirish uchun har bir tumanda qo‘shimcha 500 gektar ekin maydoni deganidir. Shuningdek, suv omborlari atrofidagi 100 ming gektardan ortiq yer bor. Bu maydonlarga irrigatsiya tarmoqlari tortib, tadbirkorlarni jalb etib, mos keladigan ekinlar ekish choralari belgilandi.

Shu bilan birga aholi ixtiyorida 380 ming gektar tomorqa borligi va ularda zarur meva-sabzavotlar yetishtirilsa, ham ro‘zg‘orga baraka, ham umumiy bozorimizga qo‘shimcha mahsulot kirishi qayd etildi. Buning uchun esa moliyaviy tizim ham bor.

Mintaqamiz uchun eng katta muammolardan biri suv taʼminotidir. Yig‘ilishda ushbu masalaga ham muhokama qilinib, Suv xo‘jaligi vazirligiga har bir mahalla kesimida kanal va ariqlarni tozalash, suv taʼminoti og‘ir joylarda quduq qazish va nasos o‘rnatib, aholi tomorqalariga suv yetkazib berish vazifasi qo‘yildi. Bu ishlar uchun respublika byudjetidan 50 milliard so‘m, mahalliy byudjetlardan yana 50 milliard so‘mdan yo‘naltirilishi belgilandi.

Davlatimiz rahbari  agrar tarmoqni moliyaviy qo‘llab-quvvatlash masalasiga ham to‘xtalib, 2022-yil uchun tijorat banklariga 2 trillion so‘m imtiyozli kredit resurslari berilganini qayd etdi. Lekin bugungi kungacha tijorat banklariga kiritilgan 790 milliard so‘mlik talabnomadan atigi 53 foizi, ayrim hududlarda esa 25-30 foizi moliyalashtirilgan, xolos. Tijorat banklarining bu boradagi faoliyati tanqid qilinib, qo‘shimcha ko‘rsatmalar berildi.

Jumladan, xizmatlar sohasi uchun tijorat banklari orqali tadbirkorlarga 5 milliard so‘mgacha kreditlar ajratilishi belgilandi. Shu bilan birga, viloyatlarda kichik va o‘rta biznesni moliyalashtirish uchun 300 million dollar resurs beriladi. Bunda kredit stavkasi 14 foizdan oshmasligi belgilandi. Shuningdek, 2022-yil 1-iyundan tadbirkorlar uchun soliq maʼmurchiligi va tekshirishlar tizimini soddalashtirish vazifasini qo‘yildi.

– Bugun tadbirkorlik uchun juda katta kredit mablag‘lari – qo‘shimcha 500 million dollar ajratilmoqda. Nima uchun ? Chunki qanchalik qiyin bo‘lmasin, hozirgi murakkab vaziyatda xalqimiz farovonligini, davlatimizning barqaror rivojlanishini o‘ylashimiz shart. Ajratiladigan har bir dollar, har bir so‘m – byudjetdanmi, bankdanmi – bu hammasi xalqning puli, – dedi Davlatimiz rahbari.

“Milliy tiklanish” demokratik partiyasining 2020-2024-yillarga mo‘ljallangan Saylovoldi dasturida ham sifatli va xavfsiz oziq-ovqat mahsulotlari ishlab chiqarishni ko‘paytirish, narxlarning keskin oshib ketishining oldini olish, uni aholining to‘lov qobiliyatiga mosligini taʼminlash bo‘yicha vazifalar belgilangan. Demak, partiyadan saylangan barcha darajadagi deputatlar hududlarda saylovchilar bilan uchrashuvlarda bu borada targ‘ibot ishlarini yana-da kuchaytirishimiz, eng asosiysi, Davlatimiz rahbari tomonidan berilgan topshiriq va vazifalar ijrosini nazoratga olishimiz lozim.       

 

 Zafar ABDIRIMOV,

Oliy Majlis Qonunchilik palatasi deputati,

Agrar va suv xo‘jaligi masalalari qo‘mitasi