Davlat arboblari, dunyo tan olgan siyosatshunoslar va taniqli ekspertlar Markaziy Osiyoning tubdan yangilanayotganini, nihoyatda qisqa bir davrda mintaqa o‘ziga xos va o‘zaro bog‘liq manfaatlarga ega yaxlit hududga aylanib borayotganini e’tirof etishyapti. Bu bejiz emas, albatta. Go‘yo kecha edi, deyarli aloqalar uzilgan, hamkorlik va qo‘shnichilik alomatlari qog‘ozlardagina qolgan mintaqa davlatlari o‘rtasida yechimini kutayotgan ming bitta muammoli masala bo‘lsa-da, bu haqda hatto og‘iz ochish ham deyarli imkonsiz edi.

Yetti-sakkiz yil avval dunyoning ayrim nuqtalarida kuch birlamchi, manfaat birlamchi degan qarashlar avj olgan bir paytda O‘zbekistonda o‘ziga xos islohotlarga start berilganini bir eslaylik: ko‘p o‘tmay ushbu o‘zgarishlar mintaqa davlatlarini ham yangilanishlar muqarrarligiga undadi, deyish mumkin.

O‘shanda millatimiz yetakchisi biz uchun eng ustuvor masala mintaqa davlatlari bilan do‘stona aloqalarning barqarorligi, degan edi. Ko‘p o‘tmay, mintaqaga o‘zaro ishonch, birodarlik tuyg‘ulari yana qaytdi.

Kuni kecha Xo‘jandda mintaqadagi barcha millat va elatlarning tinchligi, farovonligi hamda taraqqiyotiga xizmat qiladigan tarixiy voqea sodir bo‘lgani ham o‘shanda qabul qilingan qarorlar, o‘zaro muloqotlar va shu yo‘sindagi sa’y-harakatlar hosilasidir: O‘zbekiston, Tojikiston va Qirg‘izistonning mustaqil rivojlanish tarixida birinchi marta uch mamlakat davlat chegaralarining tutash nuqtasi to'g'risidagi shartnoma imzolandi. Xalqaro kuzatuvchilaru, ziyrak ekspertlar bu hujjatni “bir asrlik muammo”ga yechim bergan tarixiy hujjat deb atamoqdalar.

Haqiqat shundaki, O'zbekiston yetakchisi ta'kidlaganidek, ushbu natijaga yakdillik, kelajak oldidagi mas'uliyatni chuqur his etib, o'zaro ishonch va ochiq muloqotlarga tayangan holda erishildi.

Xulosa o'rnida aytish mumkin: yer sharining qayeridadir o'zaro ziddiyatlar, harbiy to'qnashuvlar kuchayayotgan, qurbonlar berilayotgan bir paytda Markaziy Osiyoda aholi farovonligini yanada yaxshilash, hududni rivojlangan mintaqaga aylantirish uchun real imkoniyat paydo bo'ldi. Bu esa, shubhasiz, O'zbekiston rahbarining siyosiy irodasi bilan boshlangan tarixiy jarayonlar silsilasidir.

Alisher QODIROV,
“Milliy tiklanish” demokratik partiyasi Markaziy kengashi raisi
“Milliy tiklanish” gazetasining 2025-yil 2-aprel sonidan olindi