Toshkentda Parlamentlararo Ittifoqning 150-yubiley Assambleyasi bo‘lib o‘tishi shubhasiz O‘zbekistonning xalqaro sahnada o‘z o‘rnini mustahkamlashga, shuningdek, dunyo miqyosida parlamentlararo hamkorlikni rivojlantirishga xizmat qiladi.

Maʼlumot o‘rnida: Parlamentlararo Ittifoq 1889-yilda tashkil topgan dunyoning eng qadimiy xalqaro parlament tashkilotidir.  U hozirda 179 mamlakat parlamentlari va 13 mintaqaviy parlamentlararo birlashmalarni birlashtirib, parlamentlararo muloqot uchun eng yirik platformaga aylangan. Tashkilotning asosiy maqsadi parlamentlararo samaradorlikni oshirish, xalqaro tinchlik va hamkorlikni taʼminlashdan iboratdir.

O‘zbekiston ushbu ittifoqqa 1992-yilda aʼzo bo‘lgan va 2017-yilda aʼzoligini qayta tiklagan. Assambleya O‘zbekiston parlamentining xalqaro standartlarni milliy darajada tatbiq etishga qaratilgan yangi chora-tadbirlarini qo‘llab-quvvatlashiga xizmat qilmoqda.

Tadbirda dunyoning turli burchaklaridan kelgan parlament vakillari ishtirok etadi va siyosiy, iqtisodiy, ijtimoiy masalalarda fikr almashadi. Jumladan, inson huquqlarini himoya qilish, gender tenglikni taʼminlash, ilm-fan va texnologiya, yoshlar masalalariga bag‘ishlangan turli tadbirlar tashkil etilishi rejalashtirilmoqda.

Qayd etish lozim, so‘nggi yillarda O‘zbekistonning Parlamentlararo Ittifoq bilan faol hamkorligi, shuningdek, parlament tizimini rivojlantirish bilan bog‘liq yutuqlarimiz xalqaro hamjamiyat tomonidan eʼtirof etilmoqda. Toshkentda o‘tkaziladigan ushbu Assambleya orqali O‘zbekiston jahon parlamentarizmi markaziga aylanishi kutilmoqda.

Shavkat RO‘ZMETOV,
partiya Markaziy kengashi sho‘ba mudiri