Joriy yilning 3–5-aprel kunlari Samarqand shahrida “Markaziy Osiyo – Yevropa Ittifoqi” birinchi sammiti o‘tkazilishi rejalashtirilmoqda. Bu uchrashuv mintaqaviy va xalqaro hamkorlikning yangi bosqichga chiqishi yo‘lidagi muhim tarixiy qadam hisoblanadi.

Sammit doirasida Markaziy Osiyo mamlakatlari va Yevropa Ittifoqi o‘rtasidagi hamkorlikni yanada rivojlantirish, iqtisodiy aloqalarni mustahkamlash masalalariga alohida e’tibor qaratiladi. Xususan, transport, logistika, raqamli infratuzilma, ekologiya, migratsiya, xavfsizlik, ta’lim va turizm sohalarida aniq rejalar ishlab chiqilishi, shuningdek, kengaytirilgan sheriklik va hamkorlik to‘g‘risidagi yangi bitimni qabul qilish, Transkaspiy xalqaro transport yo‘lagini jadal rivojlantirish, “yashil energetika” salohiyatini ro‘yobga chiqarish, ta’lim almashinuvi dasturlarini kengaytirish mazkur muloqot kun tartibining asosiy masalalari sifatida ko‘rilmoqda.

Ta’kidlash joiz, keyingi yillarda O‘zbekistonning Yevropa Ittifoqi bilan ikki tomonlama hamkorligi, jumladan, siyosiy, savdo-iqtisodiy, investitsiyaviy va madaniy-gumanitar sohalardagi aloqalari jadal rivojlanib bormoqda. Mazkur sammit bu aloqalarni izchil kengaytirish uchun keng imkoniyatlar yaratish bilan birga, ikki tomon uchun ham ulkan istiqbollar yaratishga xizmat qiladi.

O‘zbekistonning ochiq va pragmatik tashqi siyosat yuritishi, mintaqaviy hamkorlikni rivojlantirishga qaratilgan tashabbuslari xalqaro maydonda yuqori baholanmoqda. Sammitning aynan Samarqandda o‘tkazilishi mamlakatimizga nisbatan bildirilayotgan yuksak ishonch va e’tiborning yorqin tasdig‘i hisoblanadi.

Xulosa qilib aytganda, Yevropa Ittifoqi ham Markaziy Osiyo davlatlari uchun muhim iqtisodiy va siyosiy hamkor hisoblanadi. Tadbir doirasida qabul qilinishi kutilayotgan qarorlar ikki tomonlama o‘zaro manfaatli hamkorlikni yangi bosqichga olib chiqib, mintaqa davlatlari uchun yangi strategik imkoniyatlar yaratilishiga xizmat qiladi.

Azamat PARDAYEV,
Oliy Majlis Qonunchilik palatasidagi
“Milliy tiklanish” fraksiyasi aʼzosi