So‘nggi yillarda O‘zbekiston tashqi siyosatining muhim muloqot vositasiga aylangan parlament diplomatiyasi va parlamentlararo aloqalar yanada kengaymoqda.

O‘tgan besh yil mobaynida mamlakatimiz Parlamentlararo ittifoq, Mustaqil Davlatlar Hamdo‘stligi, Yevropada xavfsizlik va hamkorlik tashkiloti parlament assambleyalariga aʼzo bo‘ldi. Shuningdek, Shanxay hamkorlik tashkilotining Xotin-qizlar forumi, Markaziy Osiyo mamlakatlarining ikkinchi parlamentlararo forumi kabi nufuzli xalqaro tadbirlarga raislik qildi.

Parlamentlararo ittifoqning 150-yubiley Assambleyasi O‘zbekistonda o‘tkazilishi mamlakatimiz uchun shubhasiz muhim ahamiyatga ega. Bu xalqaro hamjamiyat tomonidan mamlakatimizda olib borilayotgan demokratik islohotlar va parlamentarizm rivojiga berilgan yuksak bahodir.

Tadbirda 180 dan ortiq davlat, 15 ta kuzatuvchi mamlakat hamda 25 dan ortiq xalqaro va parlamentlararo tashkilotlardan 2 mingga yaqin delegat ishtirok etishi kutilyapti. Majlisning asosiy mavzusi – "Ijtimoiy rivojlanish va adolat uchun parlament harakati" bo‘lib, unda kambag‘allikka barham berish, munosib mehnat sharoitlarini taʼminlash, barqaror rivojlanish maqsadlariga erishish, inson huquqlari, gender tengligi, yoshlarning imkoniyatlarini kengaytirish va iqlim o‘zgarishiga qarshi kurashishda parlamentlar o‘rtasidagi hamkorlikni mustahkamlash kabi masalalar muhokama qilinadi.

Shu bilan birga ushbu tadbir O‘zbekiston parlamentiga xalqaro tajriba almashish, islohotlarni namoyish etish va xalqaro hamkorlikni mustahkamlash imkonini beradi. Qabul qilinishi kutilayotgan Toshkent deklaratsiya va boshqa muhim hujjatlar esa parlamentlararo munosabatlarni rivojlantirishga xizmat qiladi. Shuningdek, xalqaro miqyosda O‘zbekiston parlamentining nufuzi ortib borayotgani va milliy qonun ijodkorligi hamda parlament nazorati sohasida orttirilgan tajribaning keng eʼtirof etilayotganini tasdiqlaydi.

Muxtasar aytganda, Parlamentlararo ittifoqning 150-Assambleyasi O‘zbekistonda o‘tkazilishi Prezidentimiz tomonidan amalga oshirilayotgan islohotlar va tashqi siyosat strategiyasi samaradorligiga xalqaro hamjamiyatning yuksak ishonchi va eʼtirofining yorqin dalilidir. Shu bilan birga, ushbu tadbir mamlakatimiz iqtisodiyoti va ijtimoiy taraqqiyotiga ijobiy taʼsir ko‘rsatib, xalqaro hamkorlikni yanada mustahkamlashga xizmat qiladi.

Ruslan JUMAMURATOV,
Oliy Majlis Qonunchilik palatasidagi
"Milliy tiklanish" partiyasi fraksiyasi a'zosi