O‘zbekiston parlamenti tarixiy voqeaga shohid bo‘lmoqda: mamlakatimiz birinchi marotaba Parlamentlararo ittifoqning 150-yubiley Assambleyasiga mezbonlik qilmoqda. Bu voqea nafaqat O‘zbekiston, balki Markaziy Osiyo uchun ham shubhasiz katta ahamiyatga ega.

Assambleyada dunyoning turli mamlakatlaridan deputatlar, siyosatchilar, diplomat va ekspertlar ishtirok etishi kutilyapti.

Mazkur keng qamrovli tadbir, mamlakatimizning tashqi siyosatdagi faolligi va xalqaro hamkorlikni rivojlantirishga qaratilgan katta qadamlardan biri hisoblanadi. Assambleyada xalqaro xavfsizlik, iqtisodiy hamkorlik, ekologik muammolar va texnologiyalar sohasidagi islohotlar, shuningdek, madaniy, gumanitar va inson huquqlari sohalarida ham konstruktiv muammolar muhokama qilinishi ko‘zda tutilgan.

Taʼkidlash joizki, O‘zbekistonning parlamentlararo assambleyaga mezbonlik qilishi mamlakatimiz uchun yangi imkoniyatlar eshigini ochadi va mintaqaviy hamkorlikning rivojlanishiga hissa qo‘shadi. Jahon parlamenti va siyosatchilari uchun katta ahamiyatga ega bo‘lgan bu forum O‘zbekistonning xalqaro siyosatdagi eʼtiborini yanada oshiradi.

Mehmonlar O‘zbekistonning siyosiy va iqtisodiy hayoti bilan ham yaqindan tanishadilar. Mamlakatimizdagi madaniy meros obyektlari va zamonaviy taraqqiyot uyg‘unligini ko‘rib, tarixiy va madaniy maskanlarni ziyorat qilish imkoniga ega bo‘ladilar.

Bir so‘z bilan aytganda, ushbu xalqaro tadbirda har bir davlatning parlamentlari o‘rtasidagi hamkorlik, global va mintaqaviy muammolarga birgalikda yechim topishga qaratilgan muhim qarorlar qabul qilinishi bilan alohida ahamiyat kasb etadi.
 
Dilnoza AZIZOVA,
Oliy Majlis Qonunchilik palatasidagi
"Milliy tiklanish" partiyasi fraksiyasi a'zosi