Yangiliklar


147

“Milliy tiklanish”ning yana bir taklifi qo‘llab-quvvatlandi

Bugun Konstitutsiyaga o‘zgartish va qo‘shimchalar kiritish bo‘yicha takliflarni shakllantirish va tashkiliy chora-tadbirlarni amalga oshirish yuzasidan Konstitutsiyaviy komissiyaning navbatdagi yig‘ilishi bo‘lib o‘tdi.

Yig‘ilishda Konstitutsiyaviy komissiyaning Takliflar bilan ishlash guruhiga kelib tushgan va saralangan hamda Yig‘ma axborot-tahlil guruhi tomonidan o‘rganib chiqilgan navbatdagi takliflar atroflicha muhokama qilindi.

Maʼlum qilinishicha, joriy yilning 17 iyun holatiga ko‘ra Takliflar bilan ishlash guruhiga jami 35 mingdan ortiq takliflar kelib tushgan.

Bu takliflarda O‘zbekistonni tashqi siyosati inson huquqlari va erkinliklarini hurmat qilish prinsip va normalariga asoslanishini tashqi siyosat prinsiplariga qo‘shish, hech kim o‘zining fuqaroviy huquqiy shartnomaviy majburiyatlarini bajara olmasligi sababli ozodlikdan mahrum etilmasligi, hech bir inson qiynoqlarga yoki shafqatsiz, g‘ayriinsoniy yoki qadr-qimmatini kamsituvchi muomalaga yoki jazoga tortilmasligi, har bir shaxs o‘z huquq va erkinliklarini qonunda taqiqlanmagan barcha usullar bilan himoya qilishga haqli ekanligini konstitutsiyaviy mustahkamlashga doir masalalar ilgari surilgan.

Shuningdek, har bir shaxs O‘zbekiston Respublikasining qonunchiligi va xalqaro shartnomalariga muvofiq o‘z huquq va erkinliklari hamda qonuniy manfaatlari inson huquqlari bo‘yicha milliy institutlar tomonidan himoya qilinishi uchun murojaat qilishga haqliligi, qonunda belgilangan tartibda faoliyat yuritayotgan barcha diniy tashkilotlarning faoliyat erkinligi kafolatlanishini nazarda tutuvchi takliflar kelib tushgan.

Qayd etilganidek, inson, uning hayoti, shaʼni, qadr-qimmati va boshqa daxlsiz huquqlari oliy qadriyatdir. Fuqarolardan kelib tushayotgan takliflarning salmoqli qismini inson huquq va erkinliklarini taʼminlashga doir takliflar tashkil etayotgani O‘zbekistonda inson huquqlarini taʼminlash borasida amalga oshirilayotgan islohotlar ortga qaytmas tus olganidan dalolat beradi.

“Milliy tiklanish” gazetasining 15 iyun sonida partiya Markaziy kengashi raisi o‘rinbosari Feruza Muhammadjanovaning “Qonun qabul qilishning ibratli namunasi” sarlavhali maqolasi eʼlon qilingan edi. Unda konstitutsiyaviy islohotlar bo‘yicha bir necha takliflar ilgari surilgan va bu takliflar Konstitutsiyaviy komissiyaga taqdim etilgan edi.

Quvonarlisi, komissiya yig‘ilishida ushbu takliflardan biri, yaʼni «Har bir shaxs o‘z huquq va erkinliklarini qonunda taqiqlanmagan barcha usullar bilan himoya qilishga haqli ekanligini mustahkamlash zarur» degan normani kiritish haqidagi taklifi komissiya aʼzolari tomonidan bir ovozdan qo‘llab-quvvatlandi.