Joriy yilning 5–9-aprel kunlari Toshkent Markaziy Osiyo tarixida birinchi marta Parlamentlararo Ittifoqning 150-yubiley Assambleyasiga mezbonlik qiladi.

Ta’kidlash joiz, Parlamentlararo ittifoq – 1889-yilda tashkil etilgan halqaro parlament tashkiloti bo‘lib, parlamentlararo muloqot uchun eng yirik platforma hisoblanadi. Hozirgi kunda 190 ga yaqin mamlakat parlamentini birlashtirib kelayotgan Parlamentlararo Ittifoq Assambleyasi yiliga ikki marotaba o‘tkaziladi.

O‘zbekistonda bo‘lib o‘tadigan mazkur Assambleyaning asosiy mavzusi “Ijtimoiy taraqqiyot va adolat uchun parlament harakati” deb nomlangani, uning doirasida butun dunyo parlamentlari aholini ijtimoiy himoya qilish, kambag‘allikni qisqartirish, huquq ustuvorligini ta’minlash borasida amalga oshirilayotgan islohotlar va o‘z tajribalari bilan o‘rtoqlashadi.

Shuni alohida ta’kidlash joizki, Assambleyaning ilk bor Markaziy Osiyo mintaqasida, O‘zbekistonda o‘tkazilishi Prezidentimiz Shavkat Mirziyoyev rahbarligida mamlakatimizda amalga oshirilayotgan demokratik islohotlar, parlamentarizmni rivojlantirish yo‘lidagi sa’y-harakatlarning jahon hamjamiyati tomonidan e’tirof etilayotganini tasdiqlaydi.

Parlamentlararo Ittifoq Assambleyasining mamlakatimizda o‘tkazilishi parlamentlar o‘rtasida xalqaro kun tartibidagi dolzarb masalalar bo‘yicha o‘zaro tajriba almashish, O‘zbekiston parlamenti faoliyati bilan tanishish, 2030-yilgacha bo‘lgan strategiyani amalga oshirishda parlamentlarning ishtirokini kengaytirish, inson huquqlari, gender tengligi, yoshlar imkoniyatlarini kengaytirish, iqlim o‘zgarishiga qarshi kurashda parlamentlar hamkorligini ko‘rib chiqish imkonini beradi.

Bir so‘z bilan aytganda, mazkur Assambleya mamlakatning xalqaro maydondagi mavqeini mustahkamlaydi, jahon hamjamiyati bilan hamkorlik qilish uchun yangi imkoniyatlar eshigini ochadi.

Go‘zal SAMIYEVA,
Oliy Majlis Qonunchilik palatasidagi
“Milliy tiklanish” fraksiyasi aʼzosi