O‘zbekiston Prezidenti Shavkat Mirziyoyevning "Markaziy Osiyo – Yevropa Ittifoqi" birinchi sammitidagi nutqi ikki mintaqa o‘rtasidagi munosabatlar istiqbolini belgilashda muhim ahamiyatga ega bo‘ldi.

Nutqda hamkorlikning besh yo‘nalishdagi dolzarb masalalar qatorida madaniy-gumanitar sohalardagi almashuvlarni ham yanada kengaytirishga urg‘u berildi. O‘tgan davrda yevropalik mutaxassislar ishtirokida “Lazgi” milliy baletining sahnalashtirilishi madaniyat sohasidagi kooperatsiyaning yaqqol misoli sifatida eʼtirof etildi.

Yevropaning Luvr, Berlin Yangi muzeyi, Vena Butunjahon muzeyi va Yevropaning boshqa mamlakatlari muzeylarida Markaziy Osiyo tarixiy merosiga oid ko‘rgazmalar o‘tkazilganligi tomonlar o‘rtasida madaniyatlar orqali bir-birini yaqindan tanish, o‘zaro tushunish bo‘yicha birgalikdagi saʼy-harakatlari natijasi sifatida qabul qilinishi lozim.

Bu borada O‘zbekiston tomonidan eʼtiborga loyiq ishlar amalga oshirilayotganligini alohida taʼkidlab o‘tish lozim. Samarqandda kuz oylarida so‘nggi 40 yilda Parijdan tashqarida ilk bor bo‘ladigan YUNESKO Bosh konferensiyasi kunlari, shuningdek, Buxoroda o‘tkazilishi rejalashtirilgan birinchi “Markaziy Osiyo – Yevropa Ittifoqi” sayyohlik forumida xalqlarimizning boy madaniyati va sanʼati bilan yanada keng tanishtirish rejalashtirilayotgani bu boradagi salmoqli qadamdir.

Madaniy aloqalarni yanada rivojlantirishga qaratilgan yana bir konsepsiya olg‘a surildi. U ham bo‘lsa, aynan Yevropa Ittifoqi tajribasidan kelib chiqib, “Bir tur – butun mintaqa” konsepsiyasini joriy etishdir. Unga ko‘ra, Markaziy Osiyoga tashrif buyuruvchi sayyohlar bir kelishda alohida olingan bir mamlakatning emas, balki butun Markaziy Osiyo mamlakatlarining madaniy-tarixiy maskanlarida bo‘lish imkoniyatlari yaratiladi.

Muxtasar qilib aytganda, madaniy aloqalarni rivojlantirish orqali xalqlarning bir-birlari bilan o‘zaro muloqotlari yanada rivojlantirish, bu borada ularga sharoitlar yaratib berish sammitning muhim qarorlaridan hisoblanadi.

Ural XAITOV,
partiya faoli