Xabaringiz bor, jamoaviy murojaatlar portalida maktablarda 5 kunlik o‘qish va ish tartibiga o‘tish bo‘yicha petitsiya e’lon qilindi.

Ma’lum qilinishicha, agar 10 mingta imzo yig‘ilsa, ushbu masala mutasaddi idoralar tomonidan ko‘rib chiqiladi. Davlatimiz rahbarining bir nutqida maktab ta’limini rivojlantirish, ta’lim sifatini oshirish, o‘qituvchilarning mashaqqatli mehnatiga munosib haq to‘lash xususida fikr yuritilib, “Ta’lim va tarbiyaning asosi, poydevori bu - maktab. Maktabni maktab qiladigan kuch esa o‘qituvchilardir” deyilgan edi.

Shubhasiz, tizimdagi o‘zgarishlar jarayonida Uchinchi Renessans bunyodkorlarini tarbiyalash mas’uliyati o‘qituvchilarni o‘z ustida yanada ko‘proq ishlashga undayapti.

5 kunlik ish tartibiga o‘tish taklifi ham sohaga bo‘lgan e’tibor nihoyatda yuqori ekanidan dalolat, albatta.

Petitsiya e’lon qilingach, ijtimoiy tarmoqlar muhokamalarga to‘lib ketdi. Kimdir davlat maktablarida faoliyat yuritayotgan 520 mingdan ortiq o‘qituvchi ham, 6,5 millionga yaqin o‘quvchi ham bu petitsiyaga jon deb rozi bo‘lishini aytsa, boshqa bir qatlam bu ta’lim sifatiga ta’sir qilishi mumkinligidan xavotir olayotganini ta’kidlayapti. Boshqa bir guruhda esa pedagog xodimlar 5 kunlik ish tizimiga o‘tkazilsa, maqsadga muvofiq bo‘lishi, ustozlar ham bemalol haftasiga 2 kun dam olsa, ish unumi va sifati oshishi to‘la qo‘llab-quvvanlanyapti.

To‘g‘ri, har bir fikrda jon bor, ammo bir narsani unutmaylik: o‘qituvchi qachon bu petitsiyani qo‘llab-quvvatlaydi? Qachonki, qisqartirilgan ish kuni uning maoshiga ta’sir qilmasa? Darvoqe, bu tajriba dunyoning ko‘plab mamlakatlarida amal qiladi. Xususan, Qozog‘istonda o‘quvchilar 12 yil davomida majburiy ravishda bepul o‘qitiladi. Dars haftasiga 5 kunni tashkil etadi.

Xullas, 4 mingga yaqin ovoz yig‘ilgan petitsiyaning tugashiga yana 85 kun bor. Hozircha kuzatamiz...

M.KARIMOVA