Qizingni o‘qit, chunki u kelajakda farzand tarbiya qiladi

“Yangi O‘zbekistonda erkin va farovon yashaylik!” degan ezgu g‘oyaning hayotdagi isboti Prezidentimizning joriy yil 18-iyul kuni qabul qilingan “Oliy, o‘rta maxsus va professional taʼlim tashkilotlarida xotin-qizlarning taʼlim olishlarini qo‘llab-quvvatlashga doir chora-tadbirlar to‘g‘risida”gi qarori yana bir karra tasdiqladi.

Ushbu qaror taʼlim tashkilotlarida tahsil olish istagidagi xotin-qizlar uchun yanada qulay shart-sharoitlar yaratish, ularning ilmiy salohiyati va malakasini tizimli oshirib borishni qo‘llab-quvvatlash maqsadida qabul qilingan. Unga ko‘ra, 2022/2023-o‘quv yilidan boshlab respublikadagi barcha xususiy, xorijiy va davlat oliy, o‘rta maxsus va professional taʼlim tashkilotlarida kunduzgi, sirtqi va kechki taʼlim shaklida xotin-qizlarning to‘lov-kontrakt asosida tahsil olishi uchun imtiyozli shartlarda taʼlim kreditlarini moliyalashtirish maqsadida tijorat banklariga Davlat byudjetidan mablag‘ ajratishning yangi tizimi joriy etilmoqda.

Taʼlim kreditlari 14 foiz stavkada ajratiladi va kreditining asosiy qismi talabaning rasmiy o‘qish muddati tugagandan so‘ng yettinchi oydan boshlab 7 yil davomida qaytariladi. Eng muhimi, “Ijtimoiy himoya yagona reyestri”ga kirgan oilalarning xotin-qizlariga ajratiladigan taʼlim kreditlari uchun garov va kafilliklar talab etilmaydi.

Albatta, har bir xotin-qizlar berilayotgan bu kabi imkoniyatlardan samarali foydalanishi zarur. Zero, mamlakatimizda xotin-qizlarga yaratilayotgan bu kabi qulayliklarni hech bir davlatda uchratmaysiz. Albatta, bunday eʼtibor va g‘amxo‘rlik yaqin kelajakda o‘z natijasini ko‘rsatishi shubhasiz. Donishmandlar taʼkidlaganlaridek, “Qizingni o‘qit, chunki u kelajakda farzand tarbiya qiladi. Agar o‘g‘lingni o‘qitsang, bir kishini o‘qitgan bo‘lasan, ammo qizingni o‘qitsang, butun jamiyatni o‘qitgan bo‘lasan”.

Sarvinoz NOSIROVA,

Xalq deputatlari Uchquduq tuman Kengashi deputati