Yangiliklar


231

Mustaqillik bizga o‘z-o‘zidan kelmagan, ko‘kdan tushmagan

Hademay O‘zbekiston Respublikasi Davlat mustaqilligining o‘ttiz bir yilligi keng nishonlaymiz. Prezidentimizning joriy yil 1- avgust kuni imzolangan "O‘zbekiston Respublikasi davlat mustaqilligining o‘ttiz bir yillik bayramiga tayyorgarlik ko‘rish va uni yuqori saviyada o‘tkazish to‘g‘risida"gi qarori bu borada bizga dasturilamal vazifasini o‘taydi.

 

Mazkur hujjatga muvofiq, “Yangi O‘zbekistonda el aziz, inson aziz” degan bosh g‘oyani o‘zida mujassam etgan tashkiliy-amaliy, maʼnaviy-maʼrifiy tadbirlar hamda targ‘ibot-tashviqot  ishlari dasturi tasdiqlandi.

 

Darhaqiqat, eng ulug‘, eng aziz bayramimiz arafasida ortga bir nazar tashlasak, tarixan qisqa ushbu vaqt ichida hur Vatanimizda juda katta ijobiy o‘zgarishlar amalga oshirildi. Ayniqsa, keyingi yillarda "Inson qadri uchun!" degan ezgu shior ostida xalqimizning yanada erkin va farovon yashashini taʼminlash maqsadida barcha sohalarda izchil islohotlar o‘tkazilmoqda. Ulkan bunyodkorlik ishlari amalga oshirilyapti.

 

Albatta, o‘tgan mustaqil taraqqiyot yo‘limiz oson kechmadi. Erishilgan yutuqlar bilan birga xato va kamchiliklarga ham yo‘l qo‘yildi. Prezidentimiz Shavkat Mirziyoyev tomonidan yuritilayotgan qatʼiy va adolatli siyosat tufayli hozirgi kunda har bir sohada shaffof tizim yaratilmoqda. "Xalq davlat idoralariga emas, davlat idoralari xalqimizga xizmat qilishi kerak" degan tamoyil ostida odamlarning hayotdan rozi bo‘lib yashashi taʼminlanyapti. Barcha darajadagi rahbarlar quyiga tushib mahallama-mahalla, uyma-uy, xonadonma-xonadon yurib, xalqimizni yillar davomida tashvishga solib kelgan muammolarni joyida hal qilish choralarini ko‘rmoqda.

Bugun hayotimizda yuz berayotgan muhim o‘zgarishlarni sanab adog‘iga yetish qiyin. Ota-bobolarimiz asrlar davomida orzu qilgan tinch va farovon kunlarga yetishdik. Albatta,  Istiqlol, Mustaqillik neʼmatlari bizga o‘z-o‘zidan kelmagan, ko‘kdan tushmagan. Ozodlik uchun qurbon bo‘lgan, nohaq qatag‘on qilingan minglab, millionlab vatandoshlarimizning qutlug‘ qoni, yaqin o‘tmishda erksevar millatimizning fidoyi farzandlari olib borgan kurashlar evaziga shunday dorilamon kunlarga erishdik.

Bugungi tahlikali va murakkab bir zamonda hamon urush va nizolar bo‘y ko‘rsatmoqda. Odamlar fikrini manipulyatsiya qilish, axborot xurujlari orqali yosh, mustaqil davlatlar fuqarolarini o‘z izmiga bo‘ysundirib, ular yashab turgan yurtlarni bosib olishga intilayotgan kuchlar mavjud. Bunday vaziyatda ogoh va hushyor bo‘lish, chetdan bo‘layotgan tutqularga uchmaslik, mustaqil davlatimizning suvereniteti, hududiy yaxlitligini saqlab qolish birinchi galdagi vazifamizdir.

Mamlakatimiz bo‘ylab "O‘zbekiston Respublikasi Konstitutsiyasiga o‘zgartish va qo‘shimchalar kiritish to‘g‘risida"gi Konstitutsiyaviy qonun loyihasining umumxalq muhokamasi o‘tkazildi. Partiyamiz asosiy tashabbuskorlardan biri bo‘lgan mazkur qonun loyihasiga hech bir yurtdoshimiz befarq qaramadi.

Yangilanayotgan Asosiy qonunimiz Sizu bizga ozod va obod Vatanda erkin va farovon yashash huquqini bermoqda. Kiritilayotgan o‘zgartirishlarda inson va uning manfaatlari oliy qadriyat sifatida muhrlanadi. Bu, o‘z navbatida “Milliy tiklanish” demokratik partiyasining "Inson o‘zgarsa  –  jamiyat o‘zgaradi" degan bosh g‘oyasini hayotda inʼikosini topayotganidan dalolat beradi.

Yangi O‘zbekiston dunyoga yuz tutmoqda. Davlatimizning insonparvarlik g‘oyalariga sodiqligi, demokratik tamoyillar asosida rivojlanish maqsadlari mamlakatimizning jahon miqyosida imijini yanada mustahkamlashga xizmat qilmoqda.

 

Ilhom RAJABOV,

partiyaning Navoiy viloyati Kengashi raisi,

Xalq deputatlari viloyat Kengashi deputati