Yangiliklar


390

“Milliy tiklanish” muhim natijani qo‘lga kiritdi

Markaziy saylov komissiyasi O‘zbekiston Respublikasi Prezidentligi saylovining dastlabki natijalarini eʼlon qildi va unga ko‘ra, O‘zbekiston Liberal-demokratik partiyasidan nomzod sifatida ishtirok etgan Shavkat Miromonovich Mirziyoyev saylovchilarning 80,1 foiz ovozi bilan g‘olib chiqdi.

“Milliy tiklanish” demokratik partiyasidan Prezidentlikka nomzod Alisher Qodirov jami saylovchilarning 5,5 foiz ovozini qo‘lga kiritdi.

Shu munosabat bilan bugun “Milliy tiklanish” demokratik partiyasi Markaziy kengashida brifing bo‘lib o‘tdi.

Brifingda Alisher Qodirov so‘zga chiqib, kecha mamlakatimizning ijtimoiy-iqtisodiy hayotidagi muhim siyosiy voqea – O‘zbekiston Respublikasi Prezidenti saylovi nihoyasiga yetgani va ushbu saylov natijalarini esa keyingi yillarda mamlakatni yangilash, hayotimizning barcha sohalarini yanada demokratlashtirishga qaratilgan siyosat inʼikosi bo‘lganini qayd etdi.

Alisher Qodirov Shavkat Mirziyoyevni o‘zi va partiya nomidan samimiy tabriklab, barchamizning umumiy maqsadimiz bo‘lgan ona Vatanimizning taraqqiyoti va xalqimizning farovonligi yo‘lida qo‘lni-qo‘lga berib, birgalikda faoliyat ko‘rsatishimiz lozimligini taʼkidladi.