Keyingi yillarda mamlakatimizda sog‘liqni saqlash tizimini tubdan isloh qilish, tibbiy xizmat ko‘rsatish sifati va samaradorligini oshirish, sohaga yangi boshqaruv usullarini joriy etish, aholini sifatli dori-darmon bilan ta’minlash borasida keng qamrovli ishlar amalga oshirilmoqda.

Xususan, so‘nggi yetti yilda mamlakatimizda tibbiyot sohasiga qaratilayotgan e’tibor va moliyaviy qo‘llab-quvvatlash ko‘lami keskin oshdi. Sohaga ajratilayotgan mablag‘lar 6 barobarga ko‘paydi. Moddiy-texnik baza yangilanib, hududiy shifoxonalarda zamonaviy sharoitlar yaratildi. Ilgari faqat poytaxtda amalga oshirilgan 400 dan ortiq yuqori texnologiyali tibbiy amaliyotlarning hozirda viloyat va tuman darajasida ham tatbiq etilayotgani ‒ tibbiy xizmatlarning aholiga yaqinlashib, hududlararo tenglik ta’minlanayotganining yorqin ifodasidir.

Yaqinda davlatimiz rahbari tomonidan o‘tkazilgan videoselektor yig‘ilishida tibbiyotning birlamchi bo‘g‘ini va ixtisoslashgan muassasalarda xizmatlar sifatini oshirish, dori vositalaridan foydalanishni tartibga solish, shuningdek, tibbiy ta’lim tizimini takomillashtirishga oid ustuvor vazifalar belgilab berildi.

Shu bilan birga, Prezidentimiz tomonidan birlamchi tibbiy xizmatni tubdan isloh qilish, oilaviy shifokor va hamshiralarning mas’uliyatini oshirish, ularni munosib moddiy rag‘batlantirish bo‘yicha belgilangan chora-tadbirlar aholining tibbiy xizmatlarga bo‘lgan ehtiyojini qondirishda hal qiluvchi omil sifatida xizmat qiladi. Xususan, oilaviy shifokor va hamshiralarga belgilangan maosh va ustamalarning malaka hamda natijadorlik asosida oshirilishi tibbiy xizmatlar sifatini yanada yaxshilashga olib keladi.

Yig‘ilishda qayd etilganidek, rivojlangan davlatlar “dalillarga asoslangan tibbiyot”ga tayanadi va klinik tadqiqotlar orqali samaradorligi hamda xavfsizligi isbotlangan dori vositalaridan foydalanadi. Afsuski, yurtimizda samaradorligi ilmiy jihatdan tasdiqlanmagan dori vositalarining importdagi ulushi 42 foizni tashkil etmoqda.

Shuningdek, Prezidentimiz tomonidan xalqaro manbalarda “samarasiz yoki samarasi o‘rganilmagan” deb baholangan vositalarni klinik protokollardan chiqarish, ayniqsa bolalar shifoxonalarida antibiotiklardan faqat asosli holatlarda foydalanish bo‘yicha tekshiruvlar o‘tkazish yuzasidan aniq topshiriqlar berildi.

Tibbiy ta’lim tizimini takomillashtirish va sohani yuqori malakali kadrlar bilan ta’minlash masalasi ham yig‘ilishda markaziy o‘rinni egalladi. Har yili mamlakatimizda 25 ming nafarga yaqin yoshlar tibbiyot yo‘nalishi bo‘yicha tahsilni boshlayotgan bo‘lsa-da, ta’lim sifatiga nisbatan jamiyatda ishonch yetarli emas. Xususan, talabalarning 40 foizdan ortig‘i xususiy oliy ta’lim muassasalarida o‘qishini inobatga olgan holda, ularning bilimi va amaliy ko‘nikmalarini baholovchi xolis va shaffof tizimning mavjud emasligi jiddiy muammo sifatida tilga olindi.

Shu munosabat bilan, tibbiyot ta’limida ilg‘or xalqaro mezonlarga muvofiq shaffof baholash tizimini joriy etish, Tibbiyot sohasini baholash milliy markazini tashkil etish hamda dual ta’lim tizimini to‘liq amalga kiritish zarurligi ta’kidlandi. Shuningdek, tibbiyot xodimlarining malakasini oshirish davlat va xususiy tibbiyot oliygohlari, ixtisoslashgan markazlar hamda viloyat tibbiyot muassasalarida amalga oshirilishi belgilandi. Bu o‘zgarishlar tibbiy kadrlarni tayyorlash jarayonini sifat jihatidan yangi pog‘onaga olib chiqishi, bitiruvchilarni amaliyotga tayyor holatda tayyorlash hamda xizmat faoliyati davomida ham ularni baholash imkonini yaratishi shubhasiz.

Umuman olganda, belgilab berilgan vazifalar sog‘liqni saqlash sohasini faqat institutsional jihatdan emas, balki mazmunan ham yangilashga, xalqimizning salomatligi, hayot sifatini tubdan yaxshilashga xizmat qiladi.

Azamat PARDAYEV,
Oliy Majlis Qonunchilik palatasidagi
“Milliy tiklanish” fraksiyasi aʼzosi